La solista Mapi Quintana fusiona jazz y tonada nun proyectu musical con epicentru n’Amsterdam

Tonada, l’asturianu como idioma vehicular y el jazz como soporte armónicu. Esos son los ingredientes del proyectu nel que trabaya n’Amsterdam la vocalista Mapi Quintana, natural de L.lena, que viaxará n’ochobre al so conceyu natal pa presentar n’Asturies el so nuevu discu, un trabayu de fusión cocíu por músicos d’Arxentina, Corea, Alemania y Holanda.

Voz en dos discos de la Big Band del Conservatoriu de Xixón asoleyaos en 1996 y 1998, ya integrante d’estremaes bandes como Tela, La Zona, Myskatis y So What?, Mapi Quintana busca siendes nueves pa la música tradicional asturiana al traviés de ritmos irregulares ya acentos inusuales que, según declara la solista, “vuelven llocos a los miembros de la banda, pero présten-yos y paécen-yos interesantes”.

Nesti sen, los músicos que trabayen con Quintana na capital d’Holanda -onde la música orixinaria de L.lena completa un master en jazz- valoren la singularidá de los sones de raigón asturianu y abluquen n’ocasiones con unes melodíes qu’asocien cola música tradicional irllandesa: “Impresionó-yos el momentu nel qu’arranqué a cantar una toná a gritu peláu”, rellata Quintana.

Resultáu d’esa xuntanza intercultural na que cada miembru’l quintetu proporciona un ‘feeling’ musical propiu del so país d’orixe ye un trabayu musical que yá ta rodáu con ésitu nes llocalidaes holandeses Amsterdam y Gronigen y que’l 12 d’ochobre prósimu aportará al acabante reinagurar teatru ‘Vital Aza’ de La Pola L.lena, un conciertu que Quintana sorraya como mui importante no artístico y no personal.

Aniciada nos estudios de música a los 7 años y residente en La Pola L.lena hasta l’añu 2000, cuando marchó a cursar un ‘bachelor degree’ nel Conservatoriu d’Amsterdam, Mapi Quintana cantó ente 1996 y 2000 na Big Band de Xixón y formó parte amás de la banda de Pipo Prendes. Na so estancia en tierres holandeses, la vocalista esperimentó con soníos hindúes, sudamericanos y flamencos, pero centró’l so interés nel jazz.

Web personal de Mapi Quintana