Portada Música Uviéu anueva’l conveniu añal cola Fundación Musical Ciudá d’Uviéu

Uviéu anueva’l conveniu añal cola Fundación Musical Ciudá d’Uviéu

by redacción asturnews

La Fundación Municipal de Cultura d’Uviéu anueva’l conveniu añal cola Fundación Musical Ciudá d’Uviéu, qu’entiende la OFIL y la Banda de Música. El conveniu aprobáu nel Conseyu Rector algama un presupuestu añal de 2 millones 930.000 euros, la mesma cuantía que l’añu pasáu, tando esti exerciciu’l presupuestu prorrogáu.

El conveniu suscritu ente l’órganu empobináu pol conceyal de Cultura José Luis Costielles y la Fundación Musical Ciudá d’Uviéu entiende la organización de toles actividaes culturales que contribuyan al desenvolvimientu cultural de la ciudá, y l’usu de los suétanos del teatru Filarmónica pa los ensayos de la OFIL, compuesta por 55 músicos, y la sala de Cámara del Auditoriu pa los ensayos de la Banda de Música, con 50 músicos más el director, ente otros compromisos.

El presidente de la Fundación Municipal de Cultura, José Luis Costillas, señaló que “dende Cultura, la mio intención ye aprovechar el luxu que tenemos n’Uviéu de disponer d’una escelente Orquesta Sinfónica y una Banda de Música profesional, y, por eso, quiero amontar la collaboración con elles nes actividaes culturales que programemos. Arreyar más a la orquesta y la banda de música n’actividaes culturales de too tipu y la so fusión con otros xéneros ye una oportunidá d’averar la música clásica a otros públicos y a otres xeneraciones a les que tamién queremos arimar la tradición melómana que ye marca de la casa n’Uviéu”.

Tamién te podria gustar