Uviéu acueye l’Asturies Revolution Tour

Esti vienres 20 de payares va desenvolvese n’Uviéu ún de los conciertos previstos de la xira Asturies Revolution, protagonizada conxuntamente polos grupos Dixebra y Fe de Ratas.L’espectáculu, que va tener llugar a les 20,30 hores na sala Sir Lauren’s d’Uviéu, tién más de tres hores de duración y nelli estes dos bandes interpreten los sos temes más conocíos, munchos d’ellos en versiones esclusives, y nos que se van intercalando músicos d’una y otra formación, con un «fin de fiesta» con tolos sos componentes nel escenariu.

Dixebra lleva más de veinticinco años siendo’l máximu representante del rock en llingua asturiana, con una propuesta onde la diversidá d’estilos (rock, reggae, ska, folk…) ye la so principal característica. Tienen editaos una docena de trabayos discográficos y na so llarga carrera tienen tocao en bien de festivales estatales y europeos. La so mayor virtú ye’l directo, que convierten nuna fiesta dinámica y reivindicativa.

Fe de Ratas tamién tienen una esperiencia abondante enriba de los escenarios, editando hasta’l momentu una decena de discos, onde muestren un estilu punk-rock rápidu y contundente, con lletres comprometíes y incisives. Participen de manera avezada nos grandes festivales, onde compartieron cartel coles bandes más prestixoses del estáu. El so directo potente, ensin concesiones, ye una de les sos meyores cualidaes.

Estes dos bandes, esponentes del rock comprometíu n’Asturies y l’estáu, collaboren xuntes per primer vez nun escenariu, con una xira que los va llevar per delles ciudaes nos próximos meses.