Unidá denuncia la marxinación d’Asturies y pide la so reconocencia como nación

“Ye preciso acabar col mitu de l’Asturies subvencionao y negociar col estáu un modelu fechu dende Asturies y p’Asturies porque sin soberanía fiscal pa poder xestionar los nuesos impuestos nun pue haber autogobiernu políticu”. Nestos terminos se pronunció esta mañana la candidata al congresu de los diputaos por UNIDÁ, Lali García, durante la presentación de les propuestes d’Estáu de la coalición.

Ignaciu Llope, cabeda de lista al senáu qu’acompañó a García durante l’actu, tamien criticó la marxinación que sufre Asturies dientro d’esti modelu d’Estáu por mor de cuntar con un estatutu “de tercer división” que nun defienda aspeutos tan básicos como la oficialidá de la llingua asturiana nin la condición nacional d’Asturies.

La cabeza de llista tamien afirmó que “anguaño nun hai nenguna formación política con representación que defenda abiertamente midíes que tornen la marxinación d’Asturies con una postura desacomplexada que nos asitie en primer división reconociendo tanto la plurinacionalidá y el plurillingüismu del estáu como la necesidá de que’l nuesu país seya reconocíu como una de les naciones integrantes del mesmu, polo que resulta más necesaria que nunca la existencia nel panorama políticu d’una opción como UNIDÁ“