Una esposición celebra 10 años de los Servicios de Normalización Llingüística n’Asturies

Esti xueves, 4 d’ochobre, a la una la tarde, va inaugurase “10 años normalizando”, una esposición que ye amuesa de los materiales editaos nestos 10 años polos Servicios de Normalización Llingüística d’Asturies. Cola collaboración y el sofitu del Centru Comercial Caudalia, la Rede de Normalización Llingüística nos Conceyos fadrá un repasu de los sos 10 años de trabayu esponiendo los materiales de les sos campañes nel centru comercial de la cuenca del Caudal, en Mieres.

La Rede de Normalización Llingüística nos Conceyos fai nesta esposición un repasu pol trabayu desenvolvíu nos 10 últimos años de llabor, dende l’apertura del primer serviciu de normalización llingüística, el de Llangréu, hasta l’apertura del últimu, el de la Mancomunidá d ‘Ozcos-Eo, pasando pola puesta en marcha del de L.lena, Xixón, Mieres, Samartín del Rei Aurelio, Avilés, Siero, Cangas, Comarca la Sidra, Mancomunidá del Cabu Peñes, Llaviana, Corvera y Parque Históricu del Navia, que formen el total de sedes actives de los servicios asturianos.

Nestos diez años los servicios de normalización llingüística de los Conceyos d’Asturies apostaron por normalizar l’usu del asturianu y del gallego-asturianu ente la ciudadanía, como bona muestra d’ello son los diferentes materiales que s’esponen: dende campañes educatives, publicaciones, a campañes sociales como la salú colos cincos sentíos; tamién hai sitiu pa los materiales dedicaos a lo más piquiñino de la casa (baberos, Llibru del naciatu); y pa la hostelería, el comerciu y el turismu.

La presentación d’esta esposición, na que van intervenir l’alcalde de L.lena Ramón Argüelles y l’alcalde de Mieres Aníbal Vázquez, amás de representantes del restu de Conceyos, responsables de los Servicios de Normalización y representantes de Caudalia va facese mañana 4 d’ochobre a les 13:00h.