Una campaña busca la promoción de xuguetes que nun seyan sexistes

La Mancomunidá d’El Cabu Peñes, a traviés del so Serviciu de Normalización Llingüística, ta repartiendo estos díes d’avientu una campaña (que se compón de folletos y pegatines) que col eslogan “Na igualdá nun quedes fuera xuegu. Porque tamién xugando deprendemos a vivir” pretende facer valorar los xuegos y xuguetes que desarrollen actitúes y comportamientu de cooperación, el respetu a les diferencies y les rellaciones d’igualdá.

Inténtase con ello contribuir a eliminar la visión de xuegos y xuguetes pa neños y xuegos y xuguetes pa neñes y concienciar y implicar a la xente na importancia del xuegu como principal instrumentu d’aprendimientu y socialización. Y ye que’l llabor de les families y les persones adultes ye escoyer xuguetes non sexistes y non violentos qu’entretengan y qu’eduquen, que permitan un desarrollu integral de neños y neñes, potenciando les sos cualidaes individuales y aquelles otres que debemos considerar importantes como la creatividá, la imaxinación, la iniciativa y el cuidáu de les demás persones. Esti sedría l’enfotu cimeru d’esta campaña, según espliquen los sos organizadores.

Dende’l Serviciu quieren recordar tamién “que’l cuartu onde xueguen ye un espaciu de convivencia onde se pue tar y xugar”, pero enxamás un “almacén de xuguetes”. Toos esos xuguetes “olvidaos” – que tean, claro ta, en condiciones afayadices – puen aprovechalos otros rapacinos y otres rapacines que nun tienen la suerte de poder mercalos de nuevos. Ye un actu de solidaridá, espliquen “que tamién mos pue ayudar a reflexonar y valorar más les coses que tenemos”.