Un xuez bloquia una web que piratiaba llibros y periódicos

El Tribunal Central de lo Contencioso Alministrativu autorizó’l bloquéu d’accesu a la páxina https://flipax2.net al traviés de la cual los usuarios podíen aportar de forma ensin autorizar a más de 1.500 títulos de llibros y casi 1.700 cabeceres de publicaciones periódiques (diarios y revistes). La decisión partió d’una solicitú de CEDRO -l’asociación que defende los intereses d’autores y editores- énte la comisión de Propiedá Intelectual del Ministeriu de Cultura y Deporte.

El procesu empecipia por aciu solicitú de CEDRO énte’l Ministeriu de Cultura y Deporte pal restablecimiento de los derechos de propiedá intelectual frayaos pola páxina, na que s’ufiertaben enllaces a copies pirates de llibros, periódicos y revistes, ensin la necesaria autorización, pa descarga de gran cantidá d’obres de testu.

En comprobando que la páxina denunciada infrinxía los derechos de propiedá intelectual, la Sección 2ª empecipió’l procedimientu de salvaguarda de los derechos posiblemente frayaos, con fecha 29 de marzu de 2022 y que remató col resolvimientu xudicial del pasáu 26 de mayu, qu’ordenaba la interrupción del serviciu de la sociedá de la información que llevaba a cabu la páxina denunciada y el bloquéu a dicha web.