Portada Gastronomía Un formientu de llaboratoriu devuelve-y sabor al ‘afuega’l pitu’

Un formientu de llaboratoriu devuelve-y sabor al ‘afuega’l pitu’

by asturnet

El quesu ‘afuega’l pitu’, producíu na zona central d’Asturies, podrá recuperar parte’l so gustu tradicional gracies a la investigación que la bacterióloga Ana Rodríguez González fexo nos diez últimos años auspiciada pol Conseyu Superior d’Investigaciones Científiques (CSIC), y qu’agora cuaya na definición d’un formientu personalizáu que fai la producción más asemeyada a la vieya ellaboración con lleche crudo.

Nel añu 1992 prohibióse l’usu de lleche natural crudo pa facer quesu frescu de menos de dos meses de mauración, obligación que llevó a abondos queseros a emplegar formientos franceses na preceptiva producción cn lleche pasteurizao. Ana Rodríguez, investigadora l’Institutu de Productos Lácteos d’Asturies (IPLA), aislló entós bacteries de los quesos orixinales de lleche crudo y fexo una esbilla de les más adecuaes pa usales con lleche pasteurizao.

El resultáu del trabayu ye un formientu específicamente pensáu pal ‘afuega’l pitu’ que yá se probó con éxitu en dos queseríes de Grao y qu’agora empieza a producir una empresa valenciana dependiente’l CSIC.

Otres dos investigaciones asemeyaes busquen formientos lácticos pal quesu Cabrales y pal quesu de Vidiago, dambos ellaboraos nel oriente asturianu.

Tamién te podria gustar