Mediu centenar d’establecimientos participen na XII edición de “OVD de pinchos”

Mediu centenar d’establecimientos van participar na XII edición del Campeonatu de pinchos y tapes d’Uviéu, “OVD de pinchos”, que va desenvolvese dende esti vienres 28 d’ochobre al 6 de payares.

El conceyal de Turismu, Hostelería y Congresos, Alfredo García Quintana presentó esta selmana, en rueda de prensa, el XII Campeonatu de pinchos y tapes d’Uviéu, “OVD de pinchos”, que se va celebrar na capital, del 28 d’ochobre al 6 de payares, y nel que van participar 50 establecimientos.

“Una vegada más apostamos pola tema gastronómicu, entendiendo la gastronomía como recursu y una de les motivaciones principales pa visitar un destín como asina lo acoten les encuestes. Esti certame ye de los más antiguos de la nuesa comunidá y, ensin dulda, dinamizará l’actividá hostelera, va fomentar la innovación gastronómica con cocina en miniatura y va escoyer a los meyores propuestes por qu’Uviéu compita nel campeonatu rexonal y nacional. Dende’l Conceyu d’Uviéu siempres vamos sofitar esti tipu d’iniciatives”, argumentó’l responsable municipal de Turismu y Hostelería, que tuvo acompañáu por Iván de la plata, Ceo de Fenicia y director del campeonatu;  David González Codón, presidente de la xunta local de Otea y Fernando Hevia, del grupu Mahou – San Miguel, patrocinador del eventu.

Iván de la plata recordó que “Uviéu foi precursor d’esti tipu de concursos y que, tres una parada de cuatro años, que retomó esti equipu de gobiernu, la edición anterior yá foi un gran ésitu y  nésta, lliberaos casi del  COVID, esperamos enllenar les cais de xente. Uviéu ye la única ciudá de tol país que dio dos campeonos d’España”.

“OVD de pinchos” va entamar “esti vienres próximu nel local de La Lleenda del Gallu, a les 13 hores. Tres la degustación de toos fadrá una selección de non más d’ocho establecimientos, na final, que se va celebrar na Escuela d’Hostelería y Turismu de Otea, en Olloniego. Ellí van preparase in situ les creaciones y el premiu va dar a conocer a los 15 minutos. El máximu galardón ye’l Vetusta d’oru, pero tamién lu hai de plata y bronce; Tamién ta’l premiu a la meyor harmonización con Mahou y el diariu La Nueva España otorga una mención al meyor pinchu popular, amás del premiu Social media,que ye’l que más me gusta’ llogra nes redes sociales. Tola información puede descargase nun códigu QR”, detalló De la plata.

El preciu de los pinchos, con bébora incluyida, indicó De la plata “ye llibre pa caúnu de los hosteleros magar encamentamos que nun sía más de cinco “.