Un ensame d’escritores pide la oficialidá y el principiu d’escepcionalidá cultural pal asturianu

Los escritores en llingua asturiana reuníos en díes pasaos nun alcuentru celebráu n’Uviéu acaben d’emitir un comunicáu nel que resumen les conclusiones finales del aconceyamientu. La principal d’elles ye “la esixencia inmediata al actual gobiernu asturianu de la declaración d’oficialidá de la llingua asturiana mediante Decretu-Llei según ordena la Constitución hespañola (sic) al respectu y la so posterior inclusión como llingua cooficial nel estatutu d’Autonomía p’Asturies” asina como “la promulgación d’una Llei de Normalización llingüística pal asturianu”. Estos autores piden tamién l’aplicación del principiu d’escepcionalidá na política cultural del Principáu y la xeneralización de la llingua en tolos niveles educativos, ente otres demandes conteníes nuna amplia tabla reivindicativa.

El grupu d’autores n’asturianu participantes na atopada d’Uviéu esponen a manera de conclusiones del conceyu diverses desixencies de calter políticu-llingüísticu, amás de les citaes, piden la implantación de la titulación de Filoloxía Asturiana y de Periodismu na Universidá d’Uviéu, la “presencia efectiva del asturianu en tolos medios de comunicación y ensin conteníos diglósicos” y la emisión del 100 por cien de la programación del ente radiotelevisu autonómicu n’asturianu.

Ente les reivindicaciones específiques que toquen al so colectivu clamien “pol repartu xustu y equitativu de los fondos destinaos a suvenciones (sic) y beques pal asturianu, que les suvenciones sirvan pa una utilidá positiva” y amás “la despolitización de los premios lliterarios, la democratización de la cultura ensin dirixismos politizaos nin interesaos, la participación efectiva de tolos escritores y ciudadanos na vida cultural del país, el respetu a los derechos de los escritores asturianos individual y colectivamente”.

Otra de les conclusiones d’esti alcuentru ye la pitición de crear un organismu equivalente al Institutu Cervantes o d’alcuerdos con esta institución pa difundir la cultura asturiana nel esterior. Por último estos autores piden l’apoyu al asturianu fuera de los llendes administrativos de la nuestra comunidá y “una defensa más contundente del asturiano (sic) del Navia-Eo” énte lo que consideren “inxerencies polítiques y nacionalistes de fuera d’Asturies”.