Portada Educación Especialistes en llingua asturiana piden-y a Educación nueves llistes

Especialistes en llingua asturiana piden-y a Educación nueves llistes

by asturnet

Un grupu d’interinos cola titulación d’Especialistes en Llingua Asturiana denunció en diversos medios -ente ellos a Asturnews- la manera na que se ta procediendo per parte d’Educacion a les contrataciones de maestros d’asturianu pa Secundaria, ensin recurrir a la convocatoria de nueves llistes y utilizando un sistema qu’esti colectivu considera “escuru y nel que podía tar contratándose a persones ensin el certificáu de capacitación” pa impartir l’asignatura de llingua asturiana. Los afectaos tienen previsto acudir el prósimu miércoles 6 d’abril a una reunión colos responsables d’Educación pa tratar esti asuntu.

Según desplicó a Asturnews un portavoz d’esti colectivu d’interinos, que prefieren abellugase nel anonimatu hasta conocer los resultaos de la reunión colos responsables educativos del Principáu, les places d’asturianu en Secundaria taríen cubriéndose nesti momentu al través d’un procedimientu que nun ye’l mesmu col que se faen les nueves contrataciones nel restu d’especialidaes y ensin siguir el protocolu habitual de facelo nuna convocatoria pública, que garantice la tresparencia y oxetividá del procesu. Les consecuencies d’esti procedimientu escepcional pal asturianu son, según aseguró el portavoz d’esti colectivu, que pueda tar contratándose a maestros ensin la capacitación suficiente pa impartir l’asignatura de llingua en Secundaria col consiguiente deterioru pa la calidá docente de la materia impartida.

Una disposición adicional referida al asturianu y añedía a la resolución pola que se convocaben les nueves bolses d’interinos ye’l fundamentu llegal nel que se basa la Conseyería d’Educación pa contratar maestros procedentes d’otres llistes d’especialidaes, como se taría faciendo, según les sospeches y datos de los interinos especialistes en llingua asturiana que denuncien esta situación. Les contrataciones “fáense de manera particular, llamando por teléfonu a los candidatos, ensin publicar la convocatoria nel tablón d’anuncies d’Educastur, talo se fai col restu de contrataciones”, afirma’l portavoz del colectivu, pa quien esta situación d’escepcionalidá “ye una amuesa más de la consideranza que tien l’asturianu pa les autoridaes educatives”. Énte esti tratamientu escepcional pa cubrir les places d’asturianu en Secundaria el colectivu pide, en primer instancia, que se “peñere l’actual llista pa escluyir d’ella a toes aquelles persones que nun tean en posesión del certificáu de capacitación pertinente” y en segunda instancia que se convoquen nueves llistes onde los interinos cola especialidá de Llingua Asturiana puedan apuntase y acreditar los correspondientes méritos académicos. En referencia a les midíes propuestes nel recién aprebáu Plan de Normalización Social de la Llingua Asturiana el portavoz de los interinos declaró que la situación creada pola disposición adicional d’Educación “va totalmente contra les midíes propuestes nel Plan y contra la normalización del asturianu en xeneral, ya que’l riesgu y la evidencia d’ufiertar una calidá deficiente de la materia pola falta de capacitación de les persones contrataes”. Esti colectivu qu’axunta a unos venticinco interinos Especialistes en Llingua Asturiana tien concertada una reunión pal prósimu miércoles 6 col responsable de Recursos Humanos de la Conseyería d’Educación pa tratar del asuntu. Dependiendo de los resultaos d’esa reunión, el colectivu podía constituíse en plataforma pública pa movilizase pola igua de la situación en casu d’algamar una respuesta negativa a les sos reivindicaciones. Otres xestiones que tienen fecho hasta agora estos interinos pa tentar solventar la situación creada, como la d’informar a los sindicatos d’enseñanza alrodiu del problema, nun tienen algamao resultaos positivos. Nos sindicatos caltiénse una actitú que’l portavoz del colectivu calificó de “pasiva, ensin que paezan mui interesaos en solucionalo a nun ser de manera individual en cada casu reclamáu”.

Tamién te podria gustar