Un concursu de TikTok quier poner a “Siero pola Igualdá”

La Conceyalía d’Igualdá del Conceyuy vieno acabante convocar “Siero pola igualdá”, un certame que, alredor del hashtag Sieroporlaigualdad, va arrexuntar vídeos na rede social TikTok pa concenciar y lluchar pola igualdá de xéneru y n’oposición al machismu. El certame forma parte de los actos alredor del 8 de marzu, Día Internacional de la Muyer.

Para participar nun ye necesariu disponer d’equipos profesionales, va bastar con un móvil… ¡y una bona hestoria que cuntar! Formar parte del certame ye tan senciellu como xubir un vídeu a la plataforma Tik Tok col hashtag del concursu y rellenar el siguiente formulariu d’inscripción (onde tamién se pueden consultar les bases).

La temática del certame va ser tolo que concierna a la llucha pola igualdá de xéneru (igualdá nel  deporte, n’oportunidaes llaborales, en xeres doméstiques, denuncia de relaciones tóxiques, oposición al machismu, empoderamiento, detección de micromachismos, llucha contra la violencia de xéneru…). La duración máxima de los vídeos va ser de 60 segundos, y pueden utilizase toles posibilidaes creatives qu’apurre la mesma rede social TikTok. Pa poder ser parte del certame va ser necesariu que la persona participante viva, estudie, trabaye o naciera en Siero.

El certame cunta con dos premios, un primer premiu dotáu con 200 euros y un segundu premiu dotáu con 100 euros. La fecha llende para la inscripción ye’l 10 de marzu y los trabayos ganadores van dar a conocer el 16 de marzu.

La iniciativa atópase encuadrada dientro del proyectu nacional “Rodando pola igualdá”, que va apigurar numberosos certames locales asemeyaos con temática d’igualdá de xéneru, que van sumar fuerces nel oxetivu común de la concienciación pola igualdá y la llucha contra’l machismu. Les obres ganadores de cada certame local van competir ente elles para dirimir cuál ye la meyor obra a nivel nacional, premiu con una dotación económica de 500 euros que se va dar a conocer el 25 de marzu.

Bases y formulariu d’inscripción