Portada Escéniques Un autor madrilanu gana’l Premiu de Testos Teatrales “Alejandro Casona”

Un autor madrilanu gana’l Premiu de Testos Teatrales “Alejandro Casona”

by asturnet

L’escritor madrilanu Alberto de Casso Basterrechea resultó ganador de la X Edición del Premiu de Testos Teatrales “Alejandro Casona”, que concede la Conseyería de Cultura y Turismu del Principáu, por una comedia titulada “La novia póstuma”. El xuráu que concedió esti galardón, dotáu con 6.000 euros, taba presidíu pol Viceconseyeru de Promoción Cultural y Política Llingüística, Jorge Fernández León.

El xuráu destacó “el gran pesu lliterariu que surde d’una narrativa áxil onde l’humor y la tenrura conviven de manera perfecta nesta comedia. Al mesmu tiempu ponse en valor la orixinalidá nel xuegu de los personaxes principales favoreciendo’l dinamismu y la frescura humorística de la obra”.

Nacíu en 1963 y llicenciáu en Filoloxía Hispánica, Alberto de Casso algamó’l Premiu Nacional de Teatru Calderón de la Barca en 1999 cola obra “Los viernes del hotel luna caribe”. En 2008 ganó’l premiu Lope de Vega cola obra “Y mi voz quemadura” y en febreru de 2009 llogró’ ex aequu’l Premiu de dramaturxa d’Escena Contemporánea cola obra “El cuerpo oculto”. Ye autor, amás, de dellos cuentos y noveles, ente elles “El Guacamayo de las Bahamas”, qu’algamó una mención especial nel Premiu de narrativa Alcalá de Henares de 1998. Anguaño ye profesor de Llingua y Lliteratura nun institutu d’Alcalá de Henares.

Tamién te podria gustar