Syntexto estrena nel teatru Riera “Oh 36!” de Lluis Portal

Esti prósimu vienres, día 6 de marzu, el grupu teatral Syntexto estrenará la obra dramática Oh 36!, de Lluís Portal -galardonada nel añu 2007 col Premiu Uviéu, que convoca’l consistorio uvieín-, nel Teatru Riera de Villaviciosa. La obra, escrita n’asturianu, inspírase na esperiencia vivida pol médicu y escritor maliayés Carlos de la Concha García-Ciaño (Villaviciosa 1887 – Xixón 1965) nel trescursu de la guerra civil española.

Home conservador, monárquicu, católicu…, durante la dictadura de Miguel Primo de Rivera, De la Concha formó parte de la formación política creada por ésti, la Unión Patriótica. Foi diputáu provincial, y fundador de los ateneos de Villaviciosa y Xixón. Fundó en 1929 -y dirixó- el periódicu local Orientaciones, d’ideoloxía conservadora, que siguió publicándose hasta l’españíu de la guerra. Escribió en castellanu y asturianu. En rima bable dio a la imprenta Ensueños y añoranzas (1923) y Cuentos perreros (1953).

Nel trescursu del conflictu bélicu, el doctor escondióse nun zulo realizáu na so propia casa -l’edificiu, de tres plantes, aínda esiste na Plaza de Carlos I de Villaviciosa-, perfeutamente disimuláu, cola fin de protexese de la persecución a que lu sometió de forma personal y concienzuda -pero infructuosa- el dirixente anarquista y masón Cristóbal Cano Servet, empleáu de la fábrica El Gaitero, y presidente del Atenéu Obreru de Villaviciosa, hasta que partiera al esiliu. Durante los 15 meses que permaneció abellugáu nel so propiu domiciliu, el doctor escribió un interesante diariu rimáu que, aínda anguaño, permanez inéditu (sacando les revelaciones recientes efectuaes por Etelvino González López na so obra Ni cautivos ni desarmados. Asturianos refugiados en Cataluña 1937-1939, de Krk edidiciones, 2008), nel que cuenta de forma detallada los acontecimientos de la guerra a los que tenía accesu, refiriéndose tanto a cuestiones locales, como a otres más xenerales.

Hasta equí los datos nos que s’inspira la obra teatral. La hestoria puede ampliase así: Cuando’l 19 d’ochobre de 1937, les tropes franquistes alcancen la ría de Villaviciosa procedentes del oriente, un grupu de republicanos, ente ellos Cristóbal Cano, preparen la so evacuación dende la dársena de El Puntal; pa ello echen mano d’un pequeñu barcu de 50 tonelaes, atracáuo nel cercanu muelle de la fábrica El Gaiteru, que llevaba por nome El Rubio. Según Etelvino, sobre las caxes de sidra yá cargaes instálense “124 milicianos y una miliciana”, citando como fonte al periódicu La Petite Gironde de Burdeos, hasta onde llegó la embarcación dos díes dempués; “toos ellos superarmaos”, ampliaba La France de Bordeaux. Nel cai confiscaríen-yos: 3 fusiles ametralladores, dos metralletes, y cincuenta fusiles automáticos perfeccionaos. La mayoría volvería a entrar a España por Cataluña pa siguir lluchando pola República. Al finar la guerra n’Asturies, Carlos de la Concha renuncia a la idea de venganza, y critica a los que la exercen, llegando a ausentase inclusu temporalmente d’Asturies cuando comprueba que nun puede facer nada por evitala.