SUATEA pide que los próximos presupuestos sían el marcu nel que s’inscriban midíes qu’ameyoren el Sistema Educativu

SUATEA pide que los próximos presupuestos sían el marcu nel que s’inscriban midíes qu’ameyoren el Sistema Educativu a la vista de que les tases de reposición del personal empleáu públicu van siguir conxelaes pa los funcionarios xenerales el próximu añu, como vieno asocediendo en tola llexislatura. Pal personal de los servicios públicos denominaos esenciales, ente ellos educación, va alzase del actual 10% al 50% (el día anterior, anunciárase que xubiría al 20%).

Nun comunicáu asoleyáu esti día, SUATEA fai un analís de la situación d’anguañu nel sistema educativu. Sigún el sindicatu, “amás confirmóse que nel so cuartu añu de llexislatura’l gobiernu del PP va caltener la conxelación salarial del personal empleáu públicu, que se suma al retayu de más del 5%, a les xubíes del IRPF y a la conxelación del 2011 decretaes pol gobiernu del PSOE”.

El sindicatu atalanta que “los retayos y conxelaciones de los salarios de los y les trabayadores de los servicios públicos provocaron nestos últimos seis años la perda d’un 25 % del poder alquisitivu2 y darréu d’ello reclamen “de primeres la devolución íntegra de la paga estra de 2012 y la fin de les conxelaciones salariales pa los y les trabayadores públicos”. Asina mesm denuncien que “les Alministraciones estatal y autonómica utilicen la sida de la crisis económica pa conxelar, a güelpe de boletín oficial, la Ufierta d’Empléu Públicu del conxuntu de les Alministraciones Públiques y llendar intensamente la Docente y Sanitaria”.

SUATEA “considera qu’estes midíes gubernamentales nun provocaron otra cosa qu’endelgazar y debilitar los servicios públicos básicos. El retrocesu nes condiciones llaborales del profesoráu ye cada vez mayor. Na enseñanza, la resultancia d’estes polítiques d’empléu públicu que denunciamos rozó’l camín pa los retayos nes plantiyes. Amás, xubieron alarmantemente los porcentaxes d’interinidá cola consiguiente inestabilidá y precariedá nel empléu (na nuesa Comunidá cerca del 25%). Retayos de docentes, temporalidá y plantiyes inestables, un cóctel qu’aniquila la tan cacarexada calidá de la enseñanza”.