Sting y Wayne Shorter ganen el premiu Polar, el ‘Nobel’ de la música

El cantante británicu Sting y el saxofonista estadounidense Wayne Shorter fueron estremaos esti llunes n’Estocolmo col Premiu Polar, consideráu’l “Nobel” de la música.

El xuráu destacó nel fallu que tantu como miembru del tríu The Police como na so posterior carrera de solista, Sting “nunca se relaxó y durmió nos lloreos”, sinón que “echó l’ancla en más puertos musicales que quiciabes nengún otru artista de la so xeneración”.

Sting supo combinar el pop col virtuosismu musical y l’apertura a tou tipu de xéneros y soníos, lo que lo convierte en “un auténticu ciudadanu del mundu”, qu’amás usó la so posición pa promover los derechos humanos. Del saxofonista de jazz el xuráu resaltó la so calidá d’esplorador musical” qu’a lo llargo de “una carrera estraordinaria buscó costantemente nuevos caminos non transitaos”.

Sting, que’l so verdaderu nome ye Gordon Summer (Wallsend, 1951), formó en 1977 con Stewart Copeland y Andy Summers The Police, una influyente banda que llanzó cinco álbumes d’estudiu, y desenvolvió depués xuna esitosa carrera como solista. A lo llargo de la so trayectoria musical Sting vendió abargana de 100 millones de discos y atropa 16 premios Grammy.

Wayne Shorter (Newark, 1933) tien xuna carrera como músicu de jazz de más de seis décades, qu’inclúin ente otros los Art Blakey’s Jazz Messengers, Miles Davis’s Second Great Quintet y Weather Report, amás d’una llarga trayectoria como solista. Sting y Shorter asoceden nel palmarés del premiu a la mezzosoprano italiana Cecilia Bartoli y al productor y compositor de música pop suecu Max Martin.

Los galardonaos van recibir el premiu, dotáu con un millón de corones sueques (114.000 dólares, 106.000 euros), de manos del rei Carlos XVI Gustavo nuna gala que se va celebrar el 15 de xunu nel Konserthus d’Estocolmo. El Premiu Polar foi creáu en 1989 por Stig Andersson, editor, compositor y representante del grupu Abba. Desque en 1992 empezó a otorgase, el Polar estremó a intérpretes como B.B. King, György Ligeti, Keith Jarrett, Bob Dylan, Ray Charres, Pierre Boulez, Elton John, Bruce Springsteen, Stevie Wonder, el grupu Pink Floyd, Dizzy Gillespie, Sony Rollins, Gilberto Gil, Ennio Morricone y Björk.