Skontra entama la xira del so nuevu discu ‘Foguera’

La banda entama esti xueves la so xira con conciertos n’Asturies, Cantabria y País Vascu

La banda referencial del punk-folk asturianu, Skontra va dar empiezu esti xueves a la primera parte de la so xira del nuevu discu ‘Foguera’ con conciertos n’Asturies, Cantabria y País Vascu Tres llanzar el so cuartu discu el pasáu mes de mayu y presentalo n’Uviéu y nel Beltane Fest de Comillas, Skontra tornen agora a los escenarios pa entamar la primera parte la so xira. Esti xueves 23 van tar nel Llar La Llegra d’Uviéu y el sábadu 25 en Puente San Miguel (Cantabria), el 7 d’agostu dirán al gaztetxe de Gasteiz y el 15 a Carabanzo (L.lena). L’últimu d’estos primeros conciertos va ser el 4 setiembre n’Avilés.

‘Foguera’ ye’l nuevu discu de Skontra tres cuasi cinco años de silenciu. Un cantu, sigún ellos, a la resistencia, una llamada a que les batalles se pueden ganar, un reconocimientu a los que lluchen. Grabáu nos estudios ACME d’Avilés cola producción de Miguel Herrero, ta cuidao al detalle con trece cantares que son como’l fueu cuando s’aviva; van de menos a más intensidá pasando pel punk, folk, rock y reggae que guía a esta banda a lo llargo los sos quince años de camín.

Esta cuarta entrega ye la más ambiciosa de Skontra y eso nótase n’abondos detalles: producción, destacaes collaboraciones, homenaxes, diseñu y edición del discu, repercusión de los sos primeros conciertos de presentación el pasáu mayu… Agora la banda entra na xira de branu cola actuación acústica nel Llar La Llegra y los conciertos nel Festival de la Mozandá Rebeldi (Cantabria), fiestes de Vitoria-Gasteiz nel Gaztetxe, el Festival Astur-Romanu de Carabanzo y les fiestes del barriu avilesín de Versalles. La contratación con vistes a la seronda ta abierta.

‘Foguera’ ta en llibre descarga y a la venta na so páxina web dende’l so llanzamientu’l pasáu 26 de mayu. De magar esta selmana va poder mercase por un preciu d’ocho euros nos sos conciertos y nos siguientes llocales: Llar La Llegra (Uviéu), Centru Social Sestaferia (Xixón), El Cafetón (Avilés), El Creisi (Candás), Riff & Guitars (Mieres) y El Paralelo (La Pola L.lena). En septiembre saldrá una edición en vinilo.