Semeyes amuesa Xixón al traviés de la fotografía esti branu

La esposición Semeyes, Xixón al traviés de la fotografía, que yá pudo visitase na pasada edición  de la Feria d’Amueses (2021) va percorrer Xixón esti branu hasta’l 26 d’agostu de 2022 al traviés de los sos Centros Municipales.

Esta esposición, Semeyes, Xixón a través de la fotografía, ye un álbum fotográficu de Xixón, un álbum públicu y non priváu, onde la ciudá y les y los xixoneses son protagonistes. Ye una historia de Xixón puesta n’escena, una historia de más d’un sieglu de la ciudá. Les semeyes qu’amuesa son memoria d’un tiempu, d’un individuu o d’un grupu, y non nel sentíu de copia, sinón de realidá. Ye un actu de xusticia colos museos y archivos del conceyu que conserven y esparden una cantidá descomanada de semeyes de Xixón, dende va sieglu y mediu hasta anguaño.

Guárdense na fototeca del Muséu del Pueblu d’Asturies, onde puen conocese fondos tan impresionantes como los de los fotógrafos xixoneses Arturo Truan, Constantino Suárez, Gonzalo del Campo o Gonzalo Vega, ente munchos otros. Por exemplu nel Archivu Municipal de Xixón, la coleición d’imáxenes del Padre Patac, llega a les 20 000 semeyes, y la denomada coleición municipal, a les 7000.

Xixón tien memoria fotográfica y tienla bien conservada. La ciudá industrial, coles sos fábriques y astilleros, ta presente nesta muestra, igual que la historia de la cultura y l’ociu y les imáxenes d’una ciudá en blanco y negro tan estremaes del color d’anguaño. Xixón pasó per aciu de la fotografía en blanco y negro, dacuando del gris, al color. Les temátiques fotográfiques que van vese en cada Centru van ser estos:

• Centru Municipal Integráu L’Sable: Xixón de postal
• Centru Municipal Integráu El Cotu: Xixón de l’alma
• Centro Municipal Integráu Atenéu La Calzada: Industria
• Centro Municipal Integráu El Llanu: Ayeri y Güei
• Centru Municipal Integráu Pumarín Xixón Sur: La ciudá