Patrimoniu

L’intentu de privatizar el términu asturianu “faba” pa usu esclusivu d’una marca vieno xenerando estos díes una fonda polémica y supón” la espresión de la situación kafkiana de la falta d’oficialidá de la nuesa llingua nacional y l’absolutu despreciu del “Principado” escontra tolo asturiano” según asoleyaba esti dói nuna nota de prensa Andecha Astur. La organización política vieno acabante dirixise a l’Academia de la Llingua Asturiana pa que, “d’alcuerdu al so mandatu estatutariu, actúe en defensa de la llingua asturiana y de los drechos de los asturianofalantes, considerando que l’intentu per parte de la Conseyería de Sanidá y Consumu de privatizar l’usu del términu asturianu “faba” pa que namás puea ser utilizáu pa los productos d’esta marca de calidá costitúi una agresión a la llingua asturiana”.

Andecha Astur diz qu’al asturianu amenorgase-y “arbitrariamente’l campu semántico del términu, comu a la del conxuntu de los asturianu falantes que namás podríen utilizar esi términu refiriéndose a la faba controlada pola DO. Términu que per otru llau ye d’usu xeneralizáu en tol país y que costitúi una referencia identitaria d’Asturies y del Pueblu Asturianu”.

Dende Andecha Astur quieren esclariar que “de mena dala tase escontra les Denominaciones d’Orixe, de les qu’habría namás que dicir que lleguen con 20 años de retrasu, cuandu pasó’l so momentu álxidu y cuandu yá se tán replantegando en toa Europa, sinón que lo que se denuncia ye’l fechu de privatizar un términu asturianu pa usu esclusivu d’una marca, contra toa llóxica y sentíu común.”

Per otra parte, Andecha Astur atalanta qu’asemeyada situación solo puede dase pola situación predemocrática que se vive n’Asturies, onde la nuesa llingua non solo nun ye oficial, “sinón que sigue siendo oxetu de represión sistemática per parte de les istituciones, especialmente dende’l “Principado”, que con esta nueva agresión llingüística pon n’evidencia tantu’l so despreciu a tolo asturianu comu la so falta de xacíu!.

El Colexu Oficial d’Inxenieros Técnicos Forestales y Graduaos n’Inxeniería Forestal y del Mediu Natural n’Asturies reclama un impulsu a la xestión sostenible y profesional de los montes asturianos. Crear emplegu nel sector forestal supon una inversión mínima si comparar con otros munchos sectores y crea oportunidaes nel mediu rural, tan precisáu d’ello.

N’Asturies, rexón eminentemente forestal, esisten munchos recursos forestales entá ensin xestionar de manera fayadiza, esisten empreses del sector con una amplia trayectoria y esperiencia, fórmense y gradúen añalmente profesionales altamente capacitaos pa esti llabor y munchos propietarios lluchen acaldía por esa xestión afayadiza del monte.

Con esti impulsu a la xestión sostenible d’estos recursos, saldría beneficiáu’l mediu natural, al ser un principiu básicu pa los profesionales la sostenibilidá del aprovechamientu, saldríen beneficiaos los propietarios privaos y públicos, lo que-yos dexaría invertir en xestión forestal y caltener a futures xeneraciones el so patrimoniu forestal, amás saldríen beneficiaes les empreses rellacionaes col sector, daqué necesariu yá que cola actual situación económica, munches d’elles atópense en dificultaes y acolumbren entá un futuru complicáu.

Sigún el Colexu, “veríase compensada la inversión que se fai a nivel educativu na Universidá d’Uviéu, en concretu na Escuela Politécnica de Mieres pa la formación de Graduaos n’Inxeniería Forestal y del Mediu Natural. Veríase favorecíu’l mediu rural, creando oportunidaes nél. Y por tou ello, veríase favorecida Asturies”.

Por ello, la Delegación Territorial d’Asturies d’esti Colexu, ufiertase “pa sirvir de nexu y sofitu a esi impulsu que favoreza la inversión público y privao y ponse a disposición d’organismos, asociaciones, propietarios, partíos políticos y a disposición de tolos ciudadanos, pa consiguir que’l mediu forestal, sía un motor d’empléu, favoreciendo’l so caltenimientu, y revalorizando los distintos usos como son los forestales, ganaderos y turísticos ente munchos otros”. Amás, esta Delegación, comprometese a siguir trabayando por qu’Asturies ocupe un llugar relevante nel sector forestal européu.

Esti próximu vienres 20 de marzu, a les 19:00 hores inaugurar na sala d’esposiciones temporales del Muséu de la Hestoria Urbana d’Avilés “La puerta a Oriente: Viaxeros, fotógrafos y coleicionistes. La familia Galé en Xapón (1900-1928)”. Tratase d’una esposición producida pol Muséu del Pueblu d’Asturies de Xixón, nel que tuvo espuesta con gran ésitu de públicu del 4 de febreru al 13 de xunetu del pasáu añu (“Asturianos nel Imperiu del Sol Naciente. Xapón al traviés de les fotografíes de Jesús y Juan Galé).

Compuesta por más de cuarenta fotografies, ente elles una perinteresante serie d’albúmines allumaes, procedentes del citáu muséu, ye frutu del trabayu d’investigación de Ramón Vega Piniella, comisariu de l’amuesa ya investigador de la Universidá d’Uviéu. Una selección d’ente los miles de fotografíes que sobre Asia y realizaes polos Galé formen parte de los fondos del muséu xixonés y que demuestren la esistencia d’un hasta agora desconocíu focu de japonismo y de coleicionismu del arte xaponés nel norte peninsular. Son fotografíes tomaes por dos avilesinos, Jesús y Juan Galé ente 1900 y 1928 nos viaxes comerciales que realizaron per Xapón y que reflexen los aspeutos de la vida cotidiana del Imperiu del Sol Naciente naquellos momentos.

L’amuesa ye un exemplu de collaboración ente’l Muséu del Pueblu d’Asturies, la xera investigadora de la Universidá d’Uviéu ya inclusive el Ministeriu d’Educación, Cultura y Deporte al formar parte la esposición del programa del Añu Dual España-Xapón (2012-2014) y qu’agora llega al Muséu de la Hestoria Urbana d’Avilés, yá que avilesinos fueron los sos autores.

L’amuesa va poder contemplase hasta’l 3 de mayu nos horarios habituales del muséu, con accesu gratuitu y siguiendo les instrucciones técniques del Muséu del Pueblu d’Asturies les sales de l’Antigua Escuela de Cerámica fueron afeches a los niveles de llume y condiciones técniques que l’amuesa rique.

La diputada d’IX na Xunta Xeneral del Principáu Emilia Vázquez va encamentar al Gobiernu autonómicu a qu’exerza “con tou rigor” nel conceyu de Grandas de Salime les competencies qu’en materia de protección del patrimoniu arqueolóxicu atribúye-y l’ordenamientu xurídicu.

La moción que va defender la diputada inclúi un segundu puntu nel qu’esixe al Gobiernu asturianu que ponga tolos medios posibles pa garantizar l’accesu plenu y siguíu al castru del Chao Samartín y al Muséu a tolos profesionales concerníos nel control, protección, estudiu ya investigación del patrimoniu arqueolóxicu de la nuesa comunidá autónoma.

El Gobiernu español afirma que’l yacimientu de Tres la Ilesia en Bañugues – Gozón- ye responsabilidá del “Principado” y del Conceyu Gozón, en rempuesta a les entrugues feches pol Senaor d’Amaiur, Jon Iñarritu, en nome d’Andecha Astur, respeutu a esi yacimientu de Tres la Ilesia. El Gobiernu español retrucó afirmando que s’atopa fuera del dominiu públicu marítimu-terrestre, polo qu’el Ministeriu d’Agricultura, Alimentación y Mediu Ambiente (MAGRAMA) nun lu incluyó ente los daños reparables del temporal de febreru de 2014, nin tien prevista la so inclusión.

Asina mesmo, na so rempuesta el Gobiernu español afita que “la protección del ámbito del yacimiento correspondería al titular de los terrenos, y la garantía de su conservación a la Administración competente en materia de patrimonio cultural”, ello ye, al Conceyu Gozón y al “Principado”.

Sigún asoleya esti día Andecha Astur na so páxina web, comu quiera que la esperiencia dexa afitada la dexadez y el desenfotu tantu d’ún comu d’otru, Andecha Astur presentó una nuea entruga, al traviés de Jon Iñarritu, esta vegada pa saber si “Actuará la Administración Central por las vías que sean precisas para garantizar que los poderes públicos cumplan su obligación constitucional de protección del patrimonio histórico”.º/p>

A la fin, Andecha Astur quier denunciar de nueu la falta d’una política cultural coherente y respetuosa por parte tantu del “Principado” como y del Conceyu Gozón, nesti casu concretu, que garantice la proteición del padrimoniu hestóricu asturianu.

El Muséu del Pueblu d’Asturies entama’l Cursu sobre Moda, estética y poder. Iconografía de la hestoria del vistíu, del 5 de marzu al 14 de mayu. Sedrá un acercamientu amenu y entreteníu a la hestoria de la indumentaria de la man de Fé Santoveña y dende l’antropoloxía social y cultural, a les razones poles cualos el ser humanu cubrió la so piel con elementos iguaos: la ropa.

Esta cobertoria, tresformada en indumentaria, traxi, paxellu o adornu, sirvió a lo llargo del tiempu pa espresar el pensamientu, les creencies, la posición social o la dedicación llaboral, la identidá la pertenencia a un grupu y tolos símbolos que nos convirtieron na especie intelixente que güei somos. Y como elementu de prestíu busquemos representar la nuesa imaxe debidamente afatiaos pa la preservación de la nuesa memoria. Primero la escultura y la pintura y dempués la fotografía, sirvieron y sirven pa conocer tantu la hestoria del traxe como de les sociedaes que la vistieron.

[

El cursu “Moda, estética y poder. Iconografíes de la hestoria del vistíu” tien d’Inscripción un plazu hasta’l 2 de marzu y un preciu de 20€. Va impartilu Fe Santoveña Zapatero, historiadora y antropóloga, tolos xueves de 18.00 a 20.00 hores, en 10 sesiones de 2 hores que van desenvolvese en marzu los díes 5 ,12, 19, 26, n’abril los díes 9, 16, 23, 30 y en mayu los díes 7 y 14.

Izquierda Xunida va presentar nel Senáu una iniciativa pa la recuperación del yacimientu de la Carisa, en L.lena, a la vista de la importancia del enclave, talamente como desplicó esti xueves Jesús Iglesias, que nuna comparecencia del alcalde de L.lena, aseguró qu’esti enclave tien de potenciase tantu pol so valor históricu como por poder ser un elementu de dinamización. El senador per Asturies, Jesús Iglesias destacó l’indiscutible valor arqueolóxicu, tantu como de les guerres cántabres como d’última trinchera frente a la invasión musulmana.

Esa importancia merez, a xuiciu del parllamentariu, d’un esfuerzu” de financiamientu estatal yá que afecta non solo a un territoriu enclaváu n’Asturies, sinón a otros yá en Llión.

Sigún Iglesias “pue considerase la posibilidá d’establecer una rede con otros finxos de les guerres cántabres n’otres Comunidaes Autónomes y, a partir d’ende, concretar un proyectu d’interés científicu, d’interés arqueolóxicu, pero tamién un preséu de dinamización económica d’estes cuenques importante”. El senador d’IX fizo anuncia tamién de que la selmana entrante va presentar una moción ante la comisión d’Educación y Cultura, percanciando la reconocencia de la trescendencia d’esti yacimientu y un compromisu económicu per parte del Gobiernu de la nación.

Jesús Iglesias aconceyó esti xueves col alcalde de L.lena, Ramón Argüelles, y colos arqueólogos Jorge Camino y Esperanza Martín precisamente pa falar de la necesidá d’un compromisu estatal que dexe siguir con unos trabayos que tán desvelando aspeutos importantes de la hestoria de L.lena, Asturies y España.

El grupu parlamentariu d’IX na Xunta Xeneral va llevar esta selmana dos asuntos bien estremaos al plenu. Na sesión del xueves la diputada Emilia Vázquez va apelar a la Conseyera d’Educación y Cultura sobre la situación del Castru de Chao Samartín, en Grandas de Salime, suxetu a distintos polémiques y pa conocer cómo s’atopa esti importante elementu del patrimoniu cultural asturianu.

Na sesión del vienres, va ser el diputáu Luis Álvarez Payo’l que defenda una moción subsiguiente a interpelación sobre’l cumplimientu del pliegu de condiciones na axudicación del Hotel de la Reconquista a la empresa HOTUSA.

La propuesta d’IX encamienta al Conseyu de Gobiernu, na so calidá d’accionista mayoritariu de la empresa titular del Hotel de la Reconquista a que desenvuelva toles acciones necesaries pa la realmisión inmediata de tolos trabayadores del citáu hotel que fueron despidíos dende l’axudicación del contratu de xestión integral del mesmu, a la revocación de toles decisiones adoptaes qu’implicaron cambeos nes sos condiciones llaborales, manifestando pública y espresamente el sofitu a los mesmos. El segundu puntu d’esta iniciativa esixe al Conseyu de Gobiernu que faiga cumplir a l’axudicataria toles clausules del contratu de xestión integral del Hotel de la Reconquista suscritu nel so día y realice un siguimientu rigorosu y siguío del mesmu.