Patrimoniu

Defendió la devolución de documentos a Cataluña, pero obvió la restitución de los ‘papeles’ asturianos. La Conseyera de Cultura’l Principáu, Ana Rosa Migoya, avaló ayeri nel Senáu el regresu de la documentación sobro la Guerra Civil reclamada pola Generalitat, nuna intervención qu’Izquierda Asturiana tilda de “surrealista” por afitar a los asturianos como “ciudadanos de segunda”.

Migoya, que participó na comisión de Comunidaes Autónomes de la Cámara Alta, centró bona parte’l so discursu en defender les tesis del Gobiernu central, que devolverá a Cataluña la documentación incautada na Guerra Civil pol bandu franquista y llueu depositada nel archivu de Salamanca. Nesi sen, la conseyera acusó al PP -promotor de la sesión d’ayeri nel Senáu- d’usar la cuestión pa sacar rentabilidá electoral y refugó abrir un alderique estatal -tamién propuestu pol PP- sobro la xunidá’l patrimoniu.

“Nun considero qu’esista un debate sobro’l repartu de competencies na estaya archivística ente l’Estáu y les comunidaes, más allá del que se quiera utilizar demagóxica y partidariamente”, sentenció Ana Rosa Migoya, qu’amás sofitó les pretensiones del Ministeriu de Cultura de crear un gran archivu centralizáu de la Guerra Civil que complete los fondos de Salamanca con otros nuevos.

Nel discursu de Migoya, qu’evitó dafechu entrar na posible vuelta al Principáu de la documentación asturiana custodiada en Salamanca, Izquierda Asturiana ve una “monumental burlla” a los ciudadanos y la ratificación de que los asturianos son “de segunda col aplausu’l Gobiernu”, yá que la conseyera defende pa Cataluña lo qu’arrenuncia a pidir pa la so propia comunidá autónoma.

El pasáu 23 d’avientu, un grupu de 17 hestoriadores, archiveros, intelectuales y xuristes encamentó, con 14 votos a favor y tres abstenciones, la devolución a Cataluña de los documentos catalanes custodiaos nel Archivu de la Guerra Civil, en Salamanca, nun informe que nun tenía calter vinculante pero que determinó la decisión final del Ministeriu de Cultura de facer efectiva esa devolución.

Nel casu d’Asturies, que cuenta con cientos de caxes de documentación nel fondu allugáu en Salamanca, tolos partíos políticos con representación parllamentaria na Xunta Xeneral refugaron yá reclamar con claridá la restitución d’esos documentos al Principáu, bien porque la microfilmación de los ‘papeles’ asturianos permite anguaño una consulta afayadiza con independencia l’allugamientu de los orixinales, por defender la integridá del archivu, o bien apelando a la prudencia.

El Principáu apuesta pol Muséu’l Xurásicu. La Conseyería de Cultura, al traviés de la Dirección Xeneral de Promoción Cultural, promocionará nos prósimos dos años l’equipamientu allugáu en Colunga ente los pasaxeros del ferry británicu que cubre trayectu regular a Santander, y habilitará precios especiales pa los 7.000 socios con que cuenta la multinacional Fnac n’Asturies.

Dambes iniciatives débense a sendos convenios roblaos en xineru pola Conseyería -l’últimu d’ellos, el de la Fnac, el pasáu día 26- que’l Principáu difunde güei y que busquen ampliar el númberu de visitantes al muséu, el de mayor ésitu de públicu d’ente tolos equipamientos museísticos de titularidá autonómica.

La promoción del Muséu Xurásicu ente los pasaxeros del ferry que xune la llocalidá británica de Plymouth con Santander llegará al travién d’un alcuerdu cola naviera Brittany Ferries, que-yos ufrirá precios especiales a los titulares d’una tarxeta de fidelización de la compañía y amás publicitará’l muséu asturianu en 10.000 cartafueyos repartíos nes sos llinies a Santander y del Canal de La Mancha. El conveniu tien vixencia hasta’l 31 d’avientu de 2006.

De forma paralela, pero sólo durante 2005, el Principáu habilita entraes a preciu reducíu pa los socios del ‘Club Fnac Ocio y Cultura’, una entidá de la multinacional d’orixe francés con establecimientu nel centru comercial Parque Principáu qu’axunta n’Asturies a unos 7.000 socios.

Web del Muséu Xurásicu

L’Arena mantendrá en pie la so memoria. El Principáu abre formalmente los trámites pa incluyir nel Inventariu de Patrimoniu Cultural l’edificiu de ‘Conservas Lis’, datáu a primeros del sieglu XX y d’estilu modernista, el caberu inmueble que se conserva como alcordanza de la hestórica industria de les conserves de pescáu na llocalidá’l Baxu Nalón.

Cola decisión d’incoar l’espediente alministrativu pa protexer l’edificiu de la conservera, publicada güei nel Boletín Oficial del Principáu (BOPA), el Principáu publicita una decisión tomada yá n’avientu pasáu pola Conseyería de Cultura a propuesta’l Plenu’l Conseyu de Patrimoniu Cultural, y respuende a la reivindicación de collectivos ciudadanos de L’Arena que veníen alertando de la posible desapaición del hestóricu inmueble por razones urbanístiques.

L’edificiu de ‘Conservas Lis’ abrióse en principiu como hotel y casinu, y depués pasó a funcionar como cine baxo los nomes sucesivos de ‘Vemfac’ y ‘Taylor’. Na dómina de la posguerra utilizóse como ilesia hasta que se reconstruyó’l templu parroquial, y na década de los cuarenta foi alquiríu a la fin pol empresariu conserveru Manuel Iglesias de la Torre, que mantuvo nél una fábrica de conserves y salazones de pescáu hasta los setenta.

L’inmueble constitúi el caberu restu vivu de los edificios de la próspera industria conservera que funcionó en L’Arena a primeros del sieglu XX, y que llegó a emplegar a cientos de trabayadores. Amás de la fábrica de ‘Conservas Lis’, na llocalidá asitiáronse ente otres les factoríes de La Arenesca, Bravo, Albo, La Marina y Garavilla.

Promulgación de la midida nel BOPA

Anteriores a 1940, que caltengan el so aspectu tradicional y que figuren n’inventarios o catálogos urbanísticos de protección. Los horros, paneres y cabazos qu’axunten eses condiciones podrán optar, a partir de mañana, a recibir parte de los 495.000 euros que la Conseyería de Cultura acuta pal remocicamientu d’eses construcciones autóctones. Les obres subvencionaes habrán acometese antes del mes de payares.

La convocatoria de les ayudes económiques, publicada na edición de güei del Boletín Oficial del Principáu d’Asturies (BOPA), establez que cada edificación podrá algamar una subvención d’hasta 9.000 euros, qu’en tou casu xustificaráse antes del prósimu 15 de payares y habrá emplegase pa obres de remocicamientu que respeten dafechu la construcción orixinal del horru, panera o cabazu y la so integración nel entornu nel que ta asitiáu.

Les solicitúes pa recibir les ayudes han tramitase énte la propia Conseyería a partir de mañana, miércoles, dientro d’un plazu que remata’l xueves 3 de marzu. Pa conceder les subvenciones, la comisión encargada d’evaluar les peticiones valorará la singularidá y antigüedá del horru candidatu, que tendrá puntuación adicional si ta allugáu nel Camín de Santiago.

A grandes rasgos, toles condiciones anteriores aplíquense tamién pa una segunda convocatoria que’l BOPA asoleya güei pa repartir un total de 95.000 euros ente quienes quieran remocicar molinos o inxenios hidráulicos tradicionales. Nesti casu, les instalaciones qu’opten a les ayudes han caltener restos orixinales abondos y tienen qu’ufrir posibilidaes de ponelos depués a furrular con continuidá.

Según los requisitos establecíos na convocatoria, queden espresamente fuera d’ella los molinos a los que’l deterioru los somorguiara nuna situación de “desnaturalización irreversible”.

Nel pásáu mes de payares, los espertos aconceyaos nel primer congresu monográficu sobro l’horru reclamaron n’Uviéu la ellaboración d’un inventariu precisu d’edificaciones, midíes afayadices de recuperación y más promoción institucional del singular graneru eleváu asturianu.

Testu íntegru de la convocatoria pa horros nel BOPA

Cangas del Narcea estrena muséu. El municipiu del suroccidente abre’l prósimu domingu les puertes d’un centru etnográficu dedicáu al mundu’l vinu, industria tradicional del conceyu, a partir d’un llagar conserváu nel barriu de Santiso. Les obres de remocicamientu y renovación del edificiu qu’alberga la prensa supusieron una inversión de 45.000 euros.

El nuevu centru etnográficu, col que l’ayuntamientu de Cangas quier emplegar p’acercar a los ciudadanos los oríxenes y la evolución de los llabores vitivinícoles nel conceyu, incorpora como elementu central una gran prensa de llagar, reconstruyida a partir de fotografíes antigües y d’una maqueta ellaborada por un vecín.

La instalación tien abellu nun edificiu cedíu pa usu cultural públicu polos vecinos de los barrios de L.lamas d’Ambasauguas y Santiso, y ta asitiada nuna de les zones con mayor tradición vitivinícola de Cangas del Narcea. Amás de contemplar el funcionamientu’l propiu llagar, los visitantes qu’acudan al nuevu equipamientu etnográficu podrán ver materiales gráficos y esplicativos sobro la industria tradicional del vinu.

Según los planes del Ayuntamientu, el muséu de Santiso funcionará como centru d’actividaes empobinaes a escolinos y d’él saldrán estremaes rutes señalizaes pa visitar los viñeos qu’hai na roliada, de los qu’esta temporada saldrán al mercáu más de 150.000 llitros de vinu.

Archivu. Los productores de Tierra de Cangas saquen al mercáu más de 150.000 llitros de vinu

Un complexu de nueva planta, con un archivu audiovisual de la música y la dancia tradicionales d’Asturies, una oficina de tramitación de festivales folclóricos y una editorial p’asoleyar trabayos sobro cultura asturiana. Esa ye la propuesta que’l Partíu Popular (PP) presentó güei énte’l Parlamentu autonómicu pa da-y más puxu a la investigación del folclore.

Nuna proposición non de llei tramitada na Xunta Xeneral del Principáu, la formación conservadora propón edificar un ‘Centru Rexonal de Folclore Asturianu’ de nueva planta, rexíu por una comisión d’espertos y financiáu con una inversión d’a lo menos 200.000 euros. Nesi hipotéticu complexu, el PP aboga por habilitar amás una editorial d’obres sobro cultura popular y un departamentu pa promocionar la música tradicional dientro y fuera’l Principáu.

Los conservadores xustifiquen la so propuesta argumentando que los investigadores de la cultura tradicional asturiana faen el so llabor anguaño con pocos medios y nun contestu dispersu que fai que, dacuando, se produzan investigaciones duplicaes o incluso contradictories.

Según el PP, les inversiones empobinaes a promocionar el folclore retrocedieron dende 1998, con datos especialmente esmolecedores na música tradicional, que, siempre según la formación conservadora, recibe agora n’ayudes tres vegaes menos qu’a finales de los años noventa.

La proposición del Partíu Popular, que previsiblemente nun prosperará nel Parlamentu, formúlase nun momentu nel que’l Gobiernu asturianu, dirixíu polos otros tres partíos con representación na Xunta -PSOE ya Izquierda Xunida-Bloque por Asturies-, ta a puntu de poner en marcha el so propiu plan pa impulsar la rede de museos etnográficos d’una forma coordinada, pero ensin grandes actuaciones como la que propón el PP.

El treslláu de pieces etnográfiques d’Uviéu a Xixón ye provisional. La conseyera de Cultura, Comunicación Social y Turismu, Ana Rosa Migoya, ratifica que la colección d’oxetos qu’agora s’amuesa nel Muséu Etnográficu del Pueblu d’Asturies regresará al Muséu Arqueolóxicu darréu culminen les obres en marcha nesti equipamientu cultural uvieín.

Migoya insiste en que tola parte etnográfica del muséu allugáu na capital ta asitiada de forma “temporal” en Xixón, y reitera que les pieces etnográfiques qu’agora tán a disposición del públicu nel Pueblu d’Asturies recorrerán el camín de vuelta a Uviéu en cuantes les obres del Arqueolóxicu lo permitan.

El treslláu de pieces d’Uviéu a Xixón yá fora diseñáu na anterior llexislatura autonómica énte la doble necesidá de protexer la colección y d’habilitar espaciu nel muséu uvieín p’acometer trabayos de meyora nes sos instalaciones.

L’actual Gobiernu autonómicu determinó que parte de la colección etnográfica del Arqueolóxicu quedare alamacenada y otra parte s’espusiera nel Muséu’l Pueblu d’Asturies, col envís de poner a disposición de los ciudadanos unos fondos que, en casu contrariu, quedaríen ocultos durante meses.

Cuatro yacimientos asturianos con güelgues de dinosauriu postúlense pa ser reconocíos como Patrimoniu de la Humanidá. Una delegación presidida pol conseyeru de Cultura de La Rioja viaxará mañana a París pa presentar énte la Unesco -axencia de les Naciones Xuníes pa la Cultura- la candidatura de los restos del Xurásicu en Tazones, La Griega, Tereñes y la playa de Ribesella, que figuren nuna llista xunta 31 yacimientos más d’otres comunidaes autónomes.

La entrega formal del llistáu de conxuntos xurásicos qu’aspiren a algamar el másimu nivel de reconocencia y protección previstu pola Unesco formalizaráse nel Centru de Patrimoniu Mundial d’esti organismu, allugada na capital de Francia.

Tres conceyos repártense la presencia na candidatura: Villaviciosa, Colunga y Ribesella, municipios que centralicen el caltenimientu, dientro d’Asturies, de güelgues de dinosauriu. De fechu, Colunga acueye’l Muséu’l Xurásicu, equipamientu que dende la so apertura al públicu na primavera pasada convirtióse nel centru museísticu más visitáu del Principáu.

La llista na que figuren los yacimientos xurásicos asturianos deberá agora pasar un primer corte nel que la Unesco fadrá una esbilla d’alredor de mediu cientu de candidatures. A partir d’esa selección, que vendría a suponer una ‘almisión a trámite’, l’alta axencia de la ONU decidirá si reconoz o non el conxuntu xurásicu ibéricu como Patrimoniu de la Humanidá, ensin un plazu determináu.

Nos primeros meses de 2004, la Unesco yá recibió un primer espediente cola candidatura de los yacimientos xurásicos, qu’agora se reenvía a l’axencia de Naciones Xuníes incluyendo nueva documentación ya incorporando encamientos de los propios técnicos de la Unesco.

Un impulsu a l’alcordanza. La Conseyería de Cultura, Comunicación Social y Turismu plantega ente los sos oxetivos pa 2005 un impulsu a la rede de museos etnográficos d’Asturies, qu’integra a trece equipamientos espardíos d’oriente a occidente y a los que’l Gobiernu autonómicu anuncia que quier tratar con mayor procuru pa meyorar la conservación del patrimoniu más popular.

Asina lo avancen les dos másimes autoridaes de la Conseyería: la propia titular del departamentu, Ana Rosa Migoya, y el director xeneral de Promoción Cultural y Política Llingüística, Carlos Madera, que nes sos últimes comparecencies públiques sorrayaron l’apueste específicu de Cultura pola rede d’etnográficos como una receta pa que los asturianos s’entiendan meyor a sigo mesmos manteniendo viva l’alcordanza d’usos y vezos populares.

Cuando l’envís de la Conseyería se lleve a la práctica, d’esa voluntá beneficiaránse un total de trece centros: La Casa Natal del Marqués de Sagardelos (Santalla d’Ozcos), l’Etnográficu de Grandas de Salime, el Muséu ‘Juan Pérez Villamil’ (Puerto Veiga), el Muséu Vaqueiru (Tinéu), l’Ecomuséu de Somiedu, el Muséu Marítimu d’Asturies (Lluanco), el Muséu de la Sidra (Nava), el Muséu de la Maera (Casu), el Muséu de la Llechería (Morcín), el Pueblu d’Asturies (Xixón) y los etnográficos de Grao, Quirós y l’Oriente.

La rede de museos etnográficos d’Asturies echó a andar nel añu 2001, entamada pola Alministración autonómica y col propósitu central de propiciar un meyor y más armónicu funcionamientu de los estremaos equipamientos, la mayoría d’ellos pequeños centros con llimitaos recursos económicos.

El Principáu argumenta agora, pa da-y puxu a la rede, que los centros etnográficos predominen na museoloxía contemporánea porque les sociedaes “necesiten cada vegada más caltener el so patrimoniu y la so memoria pa sentise segures”.

“Única n’Asturies y mui rara n’España”. Con estes pallabres definió güei l’estudiosu Francisco Crabifosse la recuperación de grabaos, illustraciones y cartelos antiguos que faen dende Xixón los Museos Casa Natal de Xovellanos y del Pueblu d’Asturies. Crabifosse censuró la “falta de sensibilidá” de les instituciones nel rescate y dignificación de les artes gráfiques.

Pal especialista xixonés, investigador de la hestoria’l grabáu y la litografía n’Asturies, les autoridaes públiques han mirar con más procuru pa la conservación de documentos gráficos que lluchen contra dos grandes enemigos: La propia vulnerabilidá del papel y la negativa, común según Crabifosse, d’entidaes y particulares a rexistrar los cartelos nel depósitu llegal, lo qu’impide conservar a lo menos una copia a salvu de la desapaición total.

El Muséu’l Pueblu d’Asturies presentó esti mediudía les sos cinco últimes alquisiciones, toes elles anteriores precisamente a la entrada en vigor del depósitu llegal, nel añu 1958. Un cartelu de promoción turística d’Asturies orixinal de Joaquín Vaquero Palacios y fecháu en 1929, col paisaxe de Cuadonga como motivu central, cuelga yá nes parés del centru etnográficu xixonés.

Tamién s’amuesen al públicu un segundu cartelu de promoción del turismu ellaboráu yá na posguerra, col horru como motivu central; una singular llamada gráfica a la victoria’l bandu nacional na Guerra Civil, producíu en L.luarca; y un cartelu que publicitó la Feria de Muestres d’Asturies en 1929, un añu depués que los artistes de Xixón protagonizaren múltiples engarradielles énte la convocatoria d’un concursu p’algamar un cartelu promotor del certame.

Completa la llista d’alquisiciones recientes del Pueblu d’Asturies un diploma de méritu otorgáu pola Escuela d’Artes y Oficios d’Avilés en 1912, con un debuxu orixinal de José Cuevas. Toos esos elementos sumáronse güei formalmente a la colección gráfica del equipamientu etnográficu xixonés, que conserva rares estampes relixoses, etiquetes de llicores, grabaos d’época y, en pallabres del director del centru, Juaco López, un abondosu catálogu que va “de los envoltorios de carambelos a les pegatines y los cartelos”.