Cultura subvenciona con 495.000 euros el remocicamientu d’horros y paneres de más de 65 años

Anteriores a 1940, que caltengan el so aspectu tradicional y que figuren n’inventarios o catálogos urbanísticos de protección. Los horros, paneres y cabazos qu’axunten eses condiciones podrán optar, a partir de mañana, a recibir parte de los 495.000 euros que la Conseyería de Cultura acuta pal remocicamientu d’eses construcciones autóctones. Les obres subvencionaes habrán acometese antes del mes de payares.

La convocatoria de les ayudes económiques, publicada na edición de güei del Boletín Oficial del Principáu d’Asturies (BOPA), establez que cada edificación podrá algamar una subvención d’hasta 9.000 euros, qu’en tou casu xustificaráse antes del prósimu 15 de payares y habrá emplegase pa obres de remocicamientu que respeten dafechu la construcción orixinal del horru, panera o cabazu y la so integración nel entornu nel que ta asitiáu.

Les solicitúes pa recibir les ayudes han tramitase énte la propia Conseyería a partir de mañana, miércoles, dientro d’un plazu que remata’l xueves 3 de marzu. Pa conceder les subvenciones, la comisión encargada d’evaluar les peticiones valorará la singularidá y antigüedá del horru candidatu, que tendrá puntuación adicional si ta allugáu nel Camín de Santiago.

A grandes rasgos, toles condiciones anteriores aplíquense tamién pa una segunda convocatoria que’l BOPA asoleya güei pa repartir un total de 95.000 euros ente quienes quieran remocicar molinos o inxenios hidráulicos tradicionales. Nesti casu, les instalaciones qu’opten a les ayudes han caltener restos orixinales abondos y tienen qu’ufrir posibilidaes de ponelos depués a furrular con continuidá.

Según los requisitos establecíos na convocatoria, queden espresamente fuera d’ella los molinos a los que’l deterioru los somorguiara nuna situación de “desnaturalización irreversible”.

Nel pásáu mes de payares, los espertos aconceyaos nel primer congresu monográficu sobro l’horru reclamaron n’Uviéu la ellaboración d’un inventariu precisu d’edificaciones, midíes afayadices de recuperación y más promoción institucional del singular graneru eleváu asturianu.

Testu íntegru de la convocatoria pa horros nel BOPA