Cuatro yacimientos xurásicos piden-y a la Unesco la declaración de Patrimoniu de la Humanidá

Cuatro yacimientos asturianos con güelgues de dinosauriu postúlense pa ser reconocíos como Patrimoniu de la Humanidá. Una delegación presidida pol conseyeru de Cultura de La Rioja viaxará mañana a París pa presentar énte la Unesco -axencia de les Naciones Xuníes pa la Cultura- la candidatura de los restos del Xurásicu en Tazones, La Griega, Tereñes y la playa de Ribesella, que figuren nuna llista xunta 31 yacimientos más d’otres comunidaes autónomes.

La entrega formal del llistáu de conxuntos xurásicos qu’aspiren a algamar el másimu nivel de reconocencia y protección previstu pola Unesco formalizaráse nel Centru de Patrimoniu Mundial d’esti organismu, allugada na capital de Francia.

Tres conceyos repártense la presencia na candidatura: Villaviciosa, Colunga y Ribesella, municipios que centralicen el caltenimientu, dientro d’Asturies, de güelgues de dinosauriu. De fechu, Colunga acueye’l Muséu’l Xurásicu, equipamientu que dende la so apertura al públicu na primavera pasada convirtióse nel centru museísticu más visitáu del Principáu.

La llista na que figuren los yacimientos xurásicos asturianos deberá agora pasar un primer corte nel que la Unesco fadrá una esbilla d’alredor de mediu cientu de candidatures. A partir d’esa selección, que vendría a suponer una ‘almisión a trámite’, l’alta axencia de la ONU decidirá si reconoz o non el conxuntu xurásicu ibéricu como Patrimoniu de la Humanidá, ensin un plazu determináu.

Nos primeros meses de 2004, la Unesco yá recibió un primer espediente cola candidatura de los yacimientos xurásicos, qu’agora se reenvía a l’axencia de Naciones Xuníes incluyendo nueva documentación ya incorporando encamientos de los propios técnicos de la Unesco.