Cultura quier impulsar la rede de museos etnográficos pa meyorar la conservación del patrimoniu

Un impulsu a l’alcordanza. La Conseyería de Cultura, Comunicación Social y Turismu plantega ente los sos oxetivos pa 2005 un impulsu a la rede de museos etnográficos d’Asturies, qu’integra a trece equipamientos espardíos d’oriente a occidente y a los que’l Gobiernu autonómicu anuncia que quier tratar con mayor procuru pa meyorar la conservación del patrimoniu más popular.

Asina lo avancen les dos másimes autoridaes de la Conseyería: la propia titular del departamentu, Ana Rosa Migoya, y el director xeneral de Promoción Cultural y Política Llingüística, Carlos Madera, que nes sos últimes comparecencies públiques sorrayaron l’apueste específicu de Cultura pola rede d’etnográficos como una receta pa que los asturianos s’entiendan meyor a sigo mesmos manteniendo viva l’alcordanza d’usos y vezos populares.

Cuando l’envís de la Conseyería se lleve a la práctica, d’esa voluntá beneficiaránse un total de trece centros: La Casa Natal del Marqués de Sagardelos (Santalla d’Ozcos), l’Etnográficu de Grandas de Salime, el Muséu ‘Juan Pérez Villamil’ (Puerto Veiga), el Muséu Vaqueiru (Tinéu), l’Ecomuséu de Somiedu, el Muséu Marítimu d’Asturies (Lluanco), el Muséu de la Sidra (Nava), el Muséu de la Maera (Casu), el Muséu de la Llechería (Morcín), el Pueblu d’Asturies (Xixón) y los etnográficos de Grao, Quirós y l’Oriente.

La rede de museos etnográficos d’Asturies echó a andar nel añu 2001, entamada pola Alministración autonómica y col propósitu central de propiciar un meyor y más armónicu funcionamientu de los estremaos equipamientos, la mayoría d’ellos pequeños centros con llimitaos recursos económicos.

El Principáu argumenta agora, pa da-y puxu a la rede, que los centros etnográficos predominen na museoloxía contemporánea porque les sociedaes “necesiten cada vegada más caltener el so patrimoniu y la so memoria pa sentise segures”.