Xixón lidera la recuperación d’illustraciones antigües cola alquisición de cinco cartelos descatalogaos

“Única n’Asturies y mui rara n’España”. Con estes pallabres definió güei l’estudiosu Francisco Crabifosse la recuperación de grabaos, illustraciones y cartelos antiguos que faen dende Xixón los Museos Casa Natal de Xovellanos y del Pueblu d’Asturies. Crabifosse censuró la “falta de sensibilidá” de les instituciones nel rescate y dignificación de les artes gráfiques.

Pal especialista xixonés, investigador de la hestoria’l grabáu y la litografía n’Asturies, les autoridaes públiques han mirar con más procuru pa la conservación de documentos gráficos que lluchen contra dos grandes enemigos: La propia vulnerabilidá del papel y la negativa, común según Crabifosse, d’entidaes y particulares a rexistrar los cartelos nel depósitu llegal, lo qu’impide conservar a lo menos una copia a salvu de la desapaición total.

El Muséu’l Pueblu d’Asturies presentó esti mediudía les sos cinco últimes alquisiciones, toes elles anteriores precisamente a la entrada en vigor del depósitu llegal, nel añu 1958. Un cartelu de promoción turística d’Asturies orixinal de Joaquín Vaquero Palacios y fecháu en 1929, col paisaxe de Cuadonga como motivu central, cuelga yá nes parés del centru etnográficu xixonés.

Tamién s’amuesen al públicu un segundu cartelu de promoción del turismu ellaboráu yá na posguerra, col horru como motivu central; una singular llamada gráfica a la victoria’l bandu nacional na Guerra Civil, producíu en L.luarca; y un cartelu que publicitó la Feria de Muestres d’Asturies en 1929, un añu depués que los artistes de Xixón protagonizaren múltiples engarradielles énte la convocatoria d’un concursu p’algamar un cartelu promotor del certame.

Completa la llista d’alquisiciones recientes del Pueblu d’Asturies un diploma de méritu otorgáu pola Escuela d’Artes y Oficios d’Avilés en 1912, con un debuxu orixinal de José Cuevas. Toos esos elementos sumáronse güei formalmente a la colección gráfica del equipamientu etnográficu xixonés, que conserva rares estampes relixoses, etiquetes de llicores, grabaos d’época y, en pallabres del director del centru, Juaco López, un abondosu catálogu que va “de los envoltorios de carambelos a les pegatines y los cartelos”.