El PP propón crear un centru xunificáu d’investigación de la música y la dancia tradicionales

Un complexu de nueva planta, con un archivu audiovisual de la música y la dancia tradicionales d’Asturies, una oficina de tramitación de festivales folclóricos y una editorial p’asoleyar trabayos sobro cultura asturiana. Esa ye la propuesta que’l Partíu Popular (PP) presentó güei énte’l Parlamentu autonómicu pa da-y más puxu a la investigación del folclore.

Nuna proposición non de llei tramitada na Xunta Xeneral del Principáu, la formación conservadora propón edificar un ‘Centru Rexonal de Folclore Asturianu’ de nueva planta, rexíu por una comisión d’espertos y financiáu con una inversión d’a lo menos 200.000 euros. Nesi hipotéticu complexu, el PP aboga por habilitar amás una editorial d’obres sobro cultura popular y un departamentu pa promocionar la música tradicional dientro y fuera’l Principáu.

Los conservadores xustifiquen la so propuesta argumentando que los investigadores de la cultura tradicional asturiana faen el so llabor anguaño con pocos medios y nun contestu dispersu que fai que, dacuando, se produzan investigaciones duplicaes o incluso contradictories.

Según el PP, les inversiones empobinaes a promocionar el folclore retrocedieron dende 1998, con datos especialmente esmolecedores na música tradicional, que, siempre según la formación conservadora, recibe agora n’ayudes tres vegaes menos qu’a finales de los años noventa.

La proposición del Partíu Popular, que previsiblemente nun prosperará nel Parlamentu, formúlase nun momentu nel que’l Gobiernu asturianu, dirixíu polos otros tres partíos con representación na Xunta -PSOE ya Izquierda Xunida-Bloque por Asturies-, ta a puntu de poner en marcha el so propiu plan pa impulsar la rede de museos etnográficos d’una forma coordinada, pero ensin grandes actuaciones como la que propón el PP.