Música

REM baxa’l ritmu. La venta d’entraes pal conciertu que la banda norteamericana ufrirá’l prósimu 29 de mayu en Xixón ralentízase después del emburrión inicial y acércase adulces a la mitá del aforu previstu nel hipódromu de Las Mestas. L’últimu recuentu fechu pol Ayuntamientu cifra en 6.700 les llocalidaes despachaes hasta agora.

Asina lo aseguraron güei responsables de la sociedá Teatru Xovellanos, encargada de programar y xestionar los espectáculos municipales de Xixón, citando el recuentu más reciente d’entraes vendíes: El pasáu xueves, l’Ayuntamientu revisó’l númberu de llocalidaes yá mercaes y ratificó que queden 300 pa les 7.000. L’aforu total ye de 15.000 persones.

Na primer quincena de xineru, primeros díes habilitaos p’alquirir entraes, el públicu retiró de los puntos de venta un total de 5.000 boletos p’acceder a Las Mestas, pero esi altu ritmu fízose enforma más sele nes cuatro selmanes siguientes, yá qu’ente el 15 de xineru y güei, 14 de febreru -el doble de tiempu que la quincena inicial- despacháronse sólo 1.700 entraes más.

Llueu de les actuaciones que REM ufrió’l mes pasáu en Barcelona y Madrid, la banda norteamericana regresará a la península Ibérica pa completar dos conciertos más, el de Xixón y ún cuartu en Torrevieja. Antes, la banda liderada por Michael Stipe viaxará por Francia, Italia, Estonia, Checoslovaquia, Noruega, Alemania, Dinamarca, Xapón y Australia.

Web oficial de la banda

Los soníos del folk asturianu viaxen a Asia. El grupu xixonés Felpeyu actuará’l prósimu 21 de xunu nun recital que se cellebrará en Líbano con ocasión del Día Mundial de la Música. L’axenda de la banda pa la temporada de 2005 inclúi tamién el regresu a Bruseles nuna actuación entamada pola emisora Radio Alma y varios conciertos n’estremaes llocalidaes de Suecia y Dinamarca.

La visita de Felpeyu a Beirut, capital de Líbano, sedrá la primer incursión del grupu nel continente asiáticu ya ensértase ente les primeres actuaciones de bandes y solistes de música tradicional asturiana n’Asia, yá que los intérpretes de folk manufacturáu nel Principáu centren les sos salíes al estranxeru n’Europa y, en menor midida, a América.

Según informen los integrantes de Felpeyu na páxina web del grupu, el so calendariu de conciertos pa 2005 abriráse’l prósimu 18 de marzu con un recital na sala De Rinck de Bruseles, reedición de l’actuación entamada l’añu pasáu en comuña cola emisora belga Radio Alma, especializada na audiencia de los emigrantes procedentes del sur d’Europa.

Dinamarca y Suecia

Nel mes de xunu, Felpeyu prevé participar nel festival de la llocalidá danesa de Halkær, una visita que los músicos xixoneses quieren rentabilizar con a lo menos otros dos conciertos nes poblaciones de Fredericia y Tonder, tamién en Dinamarca, y na ciudá sueca de Växjö.

Felpeyu formóse nel añu 1991 en Salamanca, onde Ígor Medio (bouzouki) y Ruma Barbero (percusión) cursaben estudios de Belles Artes. N’años sucesivos incorporáronse al grupu Xuan Nel Expósito (curdión), Elías García (vigulín), Fernando Oyágüez (vigulín), Diego Pangua (gaita), Lisardo Prieto (vigulín) y Carlos Redondo (guitarra).

Web oficial de Felpeyu

Les quinientes pieces del cancioneru tradicional asturianu de referencia, aloxaes nuna web portuguesa con mantenimientu en catalán. Un sitiu d’internet atropa los cantares sistematizaos pol estudiosu asturianu a primeros del sieglu XX y ufre-yos a los internautes guíes de les melodíes en midi -formatu simple d’audio- xunta los testos de les pieces.

Mantenida por Wenceslao Martínez Calonge y con un siguimientu declaráu de 15.000 páxines vistes dende marzu de 2001, la web incorpora les pieces del ‘Cancionero popular de la lírica asturiana’, asoleyáu por Martínez Torner en 1920, con una reproducción razonada de cada testu y una guía en midi pa facilitar la so interpretación.

Pesie a ello, nun se trata d’una web dedicada dafechu a la música tradicional asturiana, sinón qu’aborda con una atención asemeyada otros cancioneros del ámbitu de la península Ibérica, con pieces tradicionales de La Rioja, Segovia, Jaén y les comarques portugueses d’Alenteixo, Azores y Trás-os-Montes.

Alumnu na Schola Cantorum de París y collaborador de Ramón Menéndez Pidal, Eduardo Martínez Torner (Uviéu, 1888 – Londres, 1957) ye inda güei l’estudiosu de referencia nel folclore asturianu, depués que’l so cancioneru fora revisáu y reinterpretáu por dellos grupos de la escena folk d’anguaño, a la gueta de pieces tradicionales que tuvieren documentaes.

Web sobro’l cancioneru de Torner

Mojinos Escozíos en Xixón, Los Berrones n’Uviéu y Las Niñas y O’Funk’illo n’Avilés. El públicu residente na zona central d’Asturies tendrá eses cuatro grandes opciones musicales pa cellebrar l’antroxu, cuyos últimos preparativos acometen yá Xixón y Avilés a 48 hores del xueves de Comadres. N’Uviéu, la folixa demoraráse una selmana más.

Por orde cronolóxicu, O’Funk’illo sedrá’l primeru en facer sonar l’antroxu dende l’escenariu central de les fiestes n’Avilés, allugáu na plaza’l Parche. La so actuación produciráse’l sábadu a partir de les 23,30 hores, nuna xornada marcada pola decimoctava edición del Descensu de Galiana, con final previstu nel Parque de Les Meanes.

Dos díes depués, el llunes, Las Niñas garrarán el relevu nel antroxu avilesín, pero gran parte de la folixa antroxera d’esa nueche tará na Plaza Mayor de Xixón, onde’l grupu andaluz Mojinos Escozíos protagonizará un irreverente conciertu cuy empiezu ta previstu pa les 22,30 hores, con Jerónimo Granda en calidá de teloneru.

Dos díes depués del miércoles de ceniza, que dará por fináu l’antroxu en Xixón y Avilés, Uviéu abrirá les puertes a les sos propies cellebraciones, que van concentrase nun solu fin de selmana y que tendrán el so momentu central nun conciertu’l grupu Los Berrones na plaza de la Catedral el vienres 11 de febreru.

Programa completu del Antroxu n’Avilés

Más de 50.000 euros pa les víctimes del maremotu d’Asia. Esa foi la recaudación de la gala protagonizada ayeri n’Uviéu por una representación de músicos asturianos, ente ellos el tenor Joaquín Pixán; los cantautores Víctor Manuel San José y Toli Morilla; los gaiteros José Ángel Hevia y Alberto Varillas; el compositor Ramón Prada, y los miembros de la Orquesta Sinfónica’l Principáu.

Promovíu por Pixán, el conciertu collectivu contó amás cola participación puntual d’otros músicos representativos de los estremaos soníos que se manufacturen anguaño n’Asturies, ente ellos l’uvieín Ramón Melendi, quien s’axuntó al restu d’intérpretes pa cantar a la fin del espectáculu el ‘Asturias Patria Querida’.

Un total de dieciséis empreses, instituciones públiques y entidaes patrocinaron la gala, pa la que la sociedá bancaria Caxastur entamó una ‘fila cero’ de donativos al traviés de cuenta corriente. A los ingresos nesa llibreta hai que-yos sumar la recaudación de taquilla, onde’l públicu qu’asistió al conciertu mercó les entraes a precios d’ente 30 y 40 euros.

La cantidá total de dineru atropáu sedrá agora xestionáu pola Organización Non Gubernamental Médicos del Mundu y l’axencia de les Naciones Xuníes pa la protección de la infancia, Unicef, entidaes qu’entamarán sendos programes de sofitu a les víctimes del maremotu que dexó cientos de miles de muertos, feríos, desapaecíos y güérfanos nel sudeste asiáticu.

Fe de Ratas llega al cuatru. La banda avilesina ultima’l llanzamientu del so nuevu trabayu discográficu, ‘Tus demonios y yo’, que yá ta en procesu de masterización y verá la lluz a mediaos de febreru. El grupu presentará en directu los temes del so nuevu discu nuna xira per diez ciudades españoles qu’inclúi cites en Madrid, Vitoria, Murcia y Castellón.

Según precisa na so páxina web la productora de la banda, Santo Grial, los integrantes de Fe de Ratas asoleyarán el prósimu 19 de febreru el so nuevu álbum, grabáu nel País Vascu y amuesa de la evolución que’l grupu vien esperimentando dende la edición del so primer discu, ‘Tú tranquilo y a lo tuyo’, en 1999.

El día’l llanzamientu a les tiendes de discos del so cuartu trabayu d’estudiu, Fe de Ratas promocionará los temes del cd con un recital na Fnac del centru comercial Parque Principáu, recital al que siguirán otros nuna decena de sales españoles hasta finales d’abril, nuna llista qu’inclúi les ciudaes de Madrid, Murcia, Salamanca, Vitoria, Córdoba, Valladolid y una segunda parada n’Asturies, n’Avilés, el 8 d’abril.

Con un soníu ente’l punk y el hard rock y una trayectoria qu’entamó a mediaos de los años noventa, Fe de Ratas da-y continuidá nel so nuevu trabayu a la irreverencia respecto a lo políticamente correcto, con temes que falen de los requexos más escuros de la sociedá nun tonu abierta y contundentemente combativu.

Web oficial de Fe de Ratas

Asturies quier tar presente nel multitudinariu desfile de San Patriciu en Nueva York. El Principáu avala, nuna carta de presentación, la participación de les bandes de gaites de Corvera y Lluanco na tradicional marcha poles cais neoyorquines, que conmemorará’l patronu d’Irlanda el prósimu 17 de marzu y na que participen más de 100.000 persones.

Les dos bandes asturianes materializaríen asina la primer intervención d’una delegación del Principáu nel desfile norteamericanu, un eventu que cellebra esti añu la so edición númberu 244 y na que participen estremaes agrupaciones musicales asociaes a la cultura céltica propia de la comunidá irlandesa emigrada a América, promotora de la marcha.

Na so carta d’aval de la pretensión de dambes bandes, el director de l’Axencia Asturiana d’Emigración, Luis Miguel Fernández Romero, sorraya que la presencia en Nueva York de los gaiteros de Corvera y Gozón tien una gran importancia en dambes orielles del océanu Atlánticu y produciríase nuna ciudá na que los emigrantes asturianos mantienen un centru propiu con funcionamientu activu.

L’organismu del Gobiernu autonómicu encargáu de planificar y xestionar les polítiques d’emigración del Principáu ve amás na intención de les bandes de gaites “un fitu importantísimu de reconocimientu a la nuestra comunidá asturiana nos Estaos Xuníos y, per ende, en tol mundu”, dada la gran repercusión internacional que tien el desfile.

El llunes 31 de xineru. El grupu llangreanu Stukas, pioneru de los soníos rock n’Asturies, llanza esi día al mercáu el so nuevu trabayu discográficu, ‘A pesar de todo’, un álbum con doce nuevos temes qu’amiesta la yá veterana identidá musical de la banda con lletres que falen d’hestories cotidianes, ente elles la inmigración y la dexeneración humana de la vida urbana.

El grupu, ún de los primeros conxuntos asturianos en poner en práctica nos años sesenta los novedosos soníos elléctricos qu’aportaben dende Estaos Xuníos, presenta mañana a los medios de comunicación el so nuevu discu, que según la productora de la banda afítase nuna gran frescura musical y consigue “destacar penriba la banalidá qu’arrodia la música nestos tiempos”.

El cd de nuevu cuñu que Stukas ponen en circulación el llunes abre una nueva etapa na formación, depués del ciclu peslláu col anterior trabayu’l grupu, ‘Pasado y presente de un tiempo’, y asoléyase cola casa Grabaciones Pola. Na so llista de temes inclúinse títulos como ‘Viva la inmigración’, ‘Qué marcha más tonta’, ‘La ciudad de los idiotas’ y ‘La última bronca’.

La discográfica qu’edita la nueva incursión nos estudios de la banda llangreana -que liderare’l malográu Adolfo Altable- promete soníos bien ellaboraos, en dellos casos pegadizos, siempre baxo la etiqueta identificativa de lo que Stukas vienen faciendo dende hai yá más de cuatro décades.

Van cerca de trescientes pieces tradicionales. El grupu de folk Llan de Cubel sigue alimentando la base de datos de la que saldrá’l so prósimu trabayu, que la banda espera grabar a lo llargo d’esti añu pa frañer un silenciu discográficu que yá dura cinco años. La veterana formación volverá a difundir la música tradicional asturiana n’Estaos Xuníos nos prósimos meses.

“Igual nos pasamos de tiquismiquis”, ironiza’l componente del grupu Elías García, n’alusión al llabor de recoyida de pieces tradicionales que la banda entamó hai agora un añu y na que siguen entrando melodíes atropaes de cancioneros, grabaciones vieyes y cintes procedentes de trabayos de campu.

Trátase d’una base de datos qu’emplega el mp3 y otros formatos p’archivar y definir, con un testu alusivu, los rasgos principales de cada pieza que s’añade, na práctica totalidá d’orixen tradicional. Alpenes un 5 por cientu del material almacenáu nel archivu informáticu ta compuestu polos propios integrantes de Llan de Cubel, calcula García.

D’esi ‘almacén’ informatizáu saldrá un discu que los integrantes del grupu enfótense en grabar antes qu’acabe esti añu -anque la edición y distribución del trabayu vaigan más allá d’esi plazu- y en cuya ellaboración hai que lluchar, ente otros elementos, contra la dispersión: El vigulinista de la banda, Simon Bradley, reside n’Escocia y ye difícil centrase nuna “rutina” regular de trabayu, precisa Elías García, nun grupu nel que negún de los sos integrantes vive de la música.

Como repetición de la xira qu’entamó la pasada seronda per Estaos Xuníos, Llan de Cubel volverá a actuar nesi país nos prósimos meses. L’últimu discu que la banda folk sacó al mercáu foi ‘Un tiempu meyor’, editáu a finales de 1999 coincidiendo col decimoquintu aniversariu’l grupu.

Archivu. Primeros trabayos na base de datos de Llan de Cubel

Doce conciertos en doce díes. La banda xixonesa Doctor Explosion prepara otra vuelta les maletes pa viaxar a Italia, onde una xira intensiva tendrá ocupáu al grupu antes de la presentación del so nuevu discu y del estrenu d’una serie televisiva d’ámbitu estatal, ‘Maneras de vivir’, cuya sintonía ye obra de la banda.

Según informa la productora de Doctor Explosion, los miembros de la formación musical abrirán la xira el 15 de marzu na llocalidá francesa de Motpellier, de camín pa Italia. Nesti país, los primeros conciertos tendrán llugar nes ciudaes de Trento, Lipomo y Codevilla, antes d’actuar en fin de selmana en Roma y Bari.

Los restantes recitales que la banda xixonesa tien pesllaos en llocalidaes italianes cellebraránse en Taranto, Lecce, Ravenna, Brescia y Verona. El conciertu caberu sedrá’l domingu 27 de marzu y tendrá llugar -nuna sala, mesmo que les demás actuaciones previstes-, na ciudá de Piacenza.

Doctor Explosion regresa a Italia un añu depués de completar una xira asemeyada a la qu’agora afronta y prepara’l relevu del so últimu discu nel mercáu, ‘Totus tuus’, un doble recopilatoriu grabáu con Subterfuge Records nel que los xixoneses repasen los 15 años que lleven yá nel mundu de la música. Según avanza la productora de la banda, los xixoneses asoleyarán un nuevu trabayu d’estudiu na prósima primavera.

Executores d’un mecigayu d’estilos musicales que van dende’l punk más salvaxe hasta’l pop más melódicu, con un soníu percontundente y cola folixa y el xaréu por principiu, los integrantes de Doctor Explosion actuaron en xunu pasáu na fiesta de promoción en Madrid de la película ‘Kill Bill 2’, a la qu’asistió el so director, Quentin Tarantino.