Educación

L’Institutu d’Enseñanza Secundaria “Bernaldo de Quirós” de Mieres organiza esti miércoles 15 una xornada de convivencia que los responsables de llingua y cultura asturianes del centru califiquen de “folixa lúdico-educativa”, na qu’escolinos, pás y más, van xuntase coincidiendo cola recta final del cursu. La folixa ufierta una degustación de gastronomía local y actuaciones de música en directu.

La xornada ta empobinada a los alumnos d’asturianu y tamién a los de 1º, 2º y 3º de la E.S.O., y nel cursu de la mesma van entregase los premios a los participantes na I Olimpiada de Deporte Tradicional ‘Olimpiastur’. Una actuación de la Bandina’l Tombu y d’un gaiteru y un tamboriteru de la Banda de Gaites de Mieres ponen el puntu musical a la folixa na qu’escolinos y padres van poder degustar una amuesa de la gastronomía de la zona. La xornada cuenta col apoyu de la Oficina de Política Llingüística del Principáu.

Un total de 1.835 escolinos de primaria y 1.690 de secundaria, pertenecientes a 26 centros educativos asturianos, pidieron nes últimes selmanes a la Ministra d’ Educación y Ciencia, María Jesús San Segundo, la inserción d’una asignatura de Derechos Humanos nos planes d’estudiu de la enseñanza obligatorio. L’acción enmárcase na campaña “Por una educación en Derechos Humanos” d’Amnistía Internacional (AI).La campaña, puesta en marcha énte’l discutiniu sobre la reforma de la Llei Orgánica d’Educación (LOE), tenta que los alumnos espresen col unvíu de postales a la Ministra San Segundo les sos esmoliciones énte un proyectu de Llei que, según Lucía Fernández -responsable de la campaña n’Asturies- “nun satisfai les encamentaciones de Naciones Uníes sobre educación porque nun contempla la inserción d’una asignatura qu’aborde los derechos humanos”.

Hasta la agora, 14 centros de primaria y 12 de secundaria de toa Asturies sumáronse a la iniciativa d’Amnistía Internacional, que tien por oxetivu asegurar que la enseñanza y el deprendizaxe de los derechos humanos seyan componentes esplícitos y dafechamente desarrollaos dientro la LOE. AI pide incluyir nos planes d’estudiu una asignatura obligatoria d’ educación en derechos humanos, en tolos niveles educativos, con conteníos específicos, d’alcuerdu a les encamentaciones del “Programa Mundial pa la Educación en Derechos Humanos” de Naciones Uníes, aprobáu el 10 d’avientu de 2004.

El Programa Mundial establez como un elementu clave de les polítiques educatives la incorporación de la educación en derechos humanos dientro’l sistema d’enseñanza, la incorporación de la mesma nos planes d’ estudiu y la inserción na formación y capacitación profesional.

Nel so esfuerzu pa que les autoridaes educatives camuden el proyectu de llei, nel mes de marzu Amnistía Internacional pañó la firma de 4.500 profesionales de la educación en tol estáu. Ente los firmantes alcuéntrase el Rector de la Universidá d’ Uviéu, Juan Vázquez.

“Cosciente de la importancia que la educación tien pa consiguir un mundu nel que toles personrs disfruten d’una vida ensin abusos contra el derechu a la integridá física y mental, a la llibertá de conciencia y a nun sufrir discriminación, AI trabaya activamente pa que los derechos humanos tean presentes na formación de neños y mocedá”, afirmó Lucía Fernández.

El Claustru que diba valir pa que’l rector Juan Vázquez espunxera les llinies básiques del plan estratétixu de la Universidá d’Uviéu pa los prósimos años convirtióse nun foru de crítiques y refugos a la so xestión. Profesores contrataos, estudiantes contrarios al Espaciu Européu, los sindicatos y el personal non docente, fueron los principales autores de les crítiques, de les que Vázquez defendióse argumentando la difícil situación presupuestaria pola que pasa la institución académica.

Nun Claustru que tuvo d’esperar a la so segunda convocatoria pa algamar el quorum de participantes, el rector espunxo les llinies poles que va guiase’l plan estratéxicu de la Universidá asturiana nos prósimos años y les principales carencies que tien la institución. Nel turnu de les intervenciones hasta un númberu de 21 claustrales aprovecharon pa retrucar a Vázquez coles sos demandes, la mayoría procedentes de profesores contrataos y personal non docente que denunciaron la so situación llaboral.

Dellos de los profesores contrataos falaron de la so situación: “d’una miseria a otra miseria”, aseguró ún d’ellos y acusaron al rector de nun defender la meyora de les condiciones d’esti colectivu énte les autoridaes del Principáu. Per parte de los alumnos, les principales crítiques empobináronse a l’adecuación de la Universidá d’Uviéu al nuevu Espaciu Européu, que pa dellos estudiantes suponía “someter la institución a los petites de la empresa privada”. Tamién denunciaron los alumnos y dalgunos profesores la falta de recursos destinada a la investigación.

Juan Vázquez defendióse de les crítiques esponiendo la situación presupuestaria na que se tien de desenvolver la Universidá asturiana y afirmó que tanto dende’l so puestu como rector d’Uviéu como nel de presidente de los rectores del estáu tien llevao a les meses de l’Administración munches de les demandes que-y plantearon alumnos, profesores y personal nel Claustru celebráu ayer.

La Coordinadora Asturiana d’ONGD entama los prósimos díes 3 y 4 de xuno en Xixón un alcuentru de la rede internacional Polygone, una plataforma creada pa debatir el papel que tien xugar la educación como práctica tresformadora en distintes sociedaes del Norte y del Sur. La educación pal desarrollu y la pedagoxía popular van ser dellos de los asuntos nos que debatan los representantes de les asociaciones nesti alcuentru abiertu a la xente relacionao col mundu de la enseñanza o el movimientu asociativu.

La finalidá principal d’esti alcuentru de la rede Polygone ye poner en común los retos a los que s’enfrenta anguaño la educación pal desarrollu, asina como compartir esperiencies educatives relacionaes con temes como los derechos humanos, la interculturalidá, el mediu ambiente o la educación non-sexista. Alrodiu d’eses esmoliciones trabayen les organizacions integraes nesta rede internacional que tien ente los sos fines debatir sobre el papel que tien xugar la educación, como práctica tresformadora, en distintes sociedaes del Norte y del Sur.

Nel alcuentru de Xixón tienen previsto participar les siguientes asociaciones y ONGD: HEGOA-Vitoria (Instituto de Estudios para el Desarrollo y la Cooperación Internacional), INCYDE-Bilbao (Iniciativas de Cooperación y Desarrollo), ALBOAN-Euskadi, Coordinadora Galega de ONGD, Coordinadora de ONGD de Euskadi, Coordinadora de ONGD de Navarra, Cooordinadora Asturiana de ONGD, CEAR-Euskadi (Comisión Española de Ayuda al Refugiado), ACSUR-Las Segovias, Grupo de Educación Antirracista Eleuterio Quintanilla y Emaús-Asturies. Ente los asuntos a tratar van organizase grupos de trabayu sobre les dimensiones política, cultural, pedagóxica y metodolóxica de la Educación pal Desarrollu y la Educación Popular. Otros asuntos sobre los que se van falar son “La escuela como espaciu pa una educación tresformadora”, “Una educación pa la ciudadanía y la participación” o “Educación pa la comunicación”. L’Alcuentru celébrase esti viernes 3 y el sábadu 4 nos locales del Centru de Cultura Antigu Institutu de Xixón.

El colectivu de maestros interinos especialistes en llingua asturiana que vien denunciando dende va meses la situación de la so asignatura en Secundaria y la manera escepcional cola que la Conseyería d’Educación cubre les places valeres, apareció esta mañana en públicu nuna rueda de prensa pa llamar l’atención sobre un problema, que los afectaos calificaron de “grave” y que cinca a la “mesma calidá d’enseñanza de l’asignatura”. Na rueda de prensa, el colectivu apaeció respaldáu pola Xunta pola Defensa de la Llingua Asturiana, la única organización qu’hasta agora-yos amosó el so apoyu esplícitu.

La comparecencia énte los medios, celebrada na sé de la Xunta en Gascona, ye la primera na que los maestros d’esti colectivu s’amuesen con nomes y apellíos y decidíos a facer pública la situación de l’asignatura de llingua asturiana en Secundaria énte la pasividá de l’Administración del Principáu por dar solución a esti asuntu. El portavoz del colectivu, el maestru y escritor Pablo Rodríguez Medina, remembró los pasos daos por esti grupu d’especialistes en llingua asturiana énte los responsables de la Conseyería d’Educación y la so falta de respuesta a les cuestiones planteaes: la principal, pa estos docentes, consiguir que la contratación pa cubrir les places valeres siga’l mesmu procedimientu que pal restu de les asignatures y non la manera escepcional cola que se vien entamando al traviés d’una disposición adicional de la Conseyería que refuga l’apertura de nueves llistes, como se fai coles otres materies.

Tanto Rodríguez Medina, como momentos enantes ficiera Arantxa, otra de les interines afectaes en declaraciones a Asturnews, quisieron resaltar que la situación d’escepcionalidá entamada por Educación ta llogrando “de mano que les contrataciones nun se fagan cola tresparencia necesaria pa cualquier contratación administrativa al nun ser pública la convocatoria de les mesmes y esto ta llevando a que se cubran places con persones que nun cuenten cola capacitación pa ello”, dalgo qu’a xuiciu de los maestros d’esti colectivu: “non namás ye grave como posible irregularidá sinón que ta afectando a la mesma calidá d’enseñanza de l’asignatura de llingua asturiana, porque amás puede dase’l casu de que persones que nun cuenten cola capacitación, a los dos años de siguir cola plaza podíen recibila ensin tener los méritos necesarios”. Les xestiones entamaes hasta agora polos interinos especialistes en llingua asturiana nun tienen llograo más que “vagues promeses y nenguna solución nin voluntá de que la hubiere” por parte de les autoridaes educatives, que según desplica Arantxa: “argumenten que’l problema ta en Madrid y non equí, como si en Madrid tuvieren mui procupaos pola asignatura de llingua asturiana y el tratamientu que tenga equí”. Los sindicatos d’enseñanza tampoco paecen “especialmente esmolecíos por buscar una solución”, afirma Arantxa que describe la situación planteada ente les organizaciones sindicales como “un pasase la pelota d’unos a otros, falamos con unos y dícennos una cosa y falamos con otros y dícennos dalgo completamente distinto, nesi sen sentímonos bastante desdexaos por parte de los sindicatos”.

El respaldu de la Xunta pola Defensa de la Llingua Asturiana a les denuncies del colectivu d’interinos especialistes d’asturianu ye l’únicu qu’hasta agora tienen consiguío de manera esplícita y pública, sicasí otres asociaciones tienen amosao’l so interés polos problemes d’estos maestros de Secundaria, ente elles l’asociación Oficialidá. Miembros del colectivu que tien denunciao les posibles irregularidaes d’Educación van caltener mañana una entrevista con representantes d’Oficialidá col fin de ver la posibilidá de recibir el sofitu y asesoriamientu xurídicu que l’asociación ufierta a ciudadanos y colectivos en defensa de los sos derechos llingüísticos.

El grupu de maestros interinos especialistes en llingua asturiana que denunció va unes selmanes la manera singular na que se tán cubriendo les places d’esta asignatura y desixendo l’apertura de nueves llistes, reunióse esta selmana con Alberto Muñoz, responsable de Personal, de la Conseyería d’Educación. Na reunión el representante d’Educación admitió que yeren ciertes delles de les escepcionalidaes denunciaes polos interinos y atribuyó la situación singular d’esta especialidá a que nun ta catalogada como tala poles autoridaes educatives centrales.

El responsable de contrataciones de la Conseyería admitió énte esti grupu d’interinos especialistes en llingua asturiana que nes llistes a les que se ta recurriendo pa cubrir places hai candidatos ensin la titulación necesaria, inda negó que nengún interín ensin ella tea dando clases nesti momentu. Muñoz tamién admitió que’l procedimientu pa convocar a los candidatos yera por llamada telefónica directa, ensin la publicidá regular que la lexislación desixe a les contrataciones de l’Administración. El responsable de la Conseyería aseguró qu’esti procedimientu non namás se siguía nel casu de l’asignatura de llingua asturiana sinón tamién n’otres especialidaes nos casos d’urxencia, col fin de que los escolinos nun se vieren faltos de profesor. Al empar, Alberto Muñoz, comprometióse a iguar esta situación y que nun futuru prósimu el procedimientu fuere con publicidá.

Fontes del colectivu de maestros especialistes en llingua asturiana interinos espresaron a Asturnews la so decepción énte les desplicaciones ufiertaes por Educación nel aconceyamientu del pasáu xueves 14 d’abril: “que vienen namás a confirmar lo que nós sospechábamos y tamién que nun hai voluntá nenguna por iguar la situación”, afirmó un portavoz d’esti grupu. La principal esmolición d’esti colectivu ye “comprobar que se quier dar un tratu d’escepcionalidá a l’asignatura en llingua asturiana na que vale too, dende dexar places ensin cubrir hasta cubriles ensin dar la posibilidá de que los candidatos con más méritos se puedan presentar a una bolsa abierta como nel restu posibilidaes”, pa esti grupu d’interinos “el fin que paez pretendese ye convertir a la llingua asturiana nuna auténtica ‘maría’ énte la que los mesmos pás de los escolinos atopen que nun ye una asignatura seria, y a la vez,una amuesa por parte d’Educación de la consideranza que-y merecen los profesores d’esta especialidá y ella mesma”.

Respective al papel que taríen xugando los sindicatos na negociación que caltienen cola Conseyería sobre diversos temes, ente ellos ésti, los interinos d’esti colectivu aseguren sentise “solos y desamparaos, ensin saber lo que realmente tán negociando nin si tienen verdaderu interés en correxir la situación creada “. El colectivu recibió estos díes el sofitu de la Xunta pola Defensa de la Llingua que s’ufiertó a colaborar con ellos y apoyalos nes sos reivindicaciones: “ye l’únicu apoyu esplícitu que recimos agora, amás del que nos tais ufiertando dellos medios en llingua asturiana”, afirmó el portavoz de los interinos especialistes en llingua asturiana. Les persones axuntaes alrodiu el mesmu problema común tán a la espera de lo que-yos aconseye’l so abogáu y a los resultaos de la negociación caltenida polos sindicatos cola conseyería.

La situación especial na que s’alcuentren los interinos especialistes en llingua asturiana a la hora de ser contrataos pola Conseyería d’Educación pa cubrir places valeres podía iguase si prosperen les negociaciones que tan calteniendo los sindicatos d’enseñanza colos responsables d’Educación del Principáu. Mentantu el colectivu nel que s’axuntaron un grupu d’interinos nesta situación sigue ensin consiguir una respuesta concreta a les sos reivindicaciones por parte l’Administración, tres l’aplazamientu de la reunión que teníen concertada esta selmana y que va celebrase’l prósimu xueves 14 na Conseyería d’Educación.

Fontes sindicales consultaes por Asturnews amosábense enfotaes en llograr una solución satisfactoria na que s’afayen los interinos especialistes en llingua asturiana por cuenta de la disposición adicional añadía a la última convocatoria de bolses de trabayu y que se refier namás a esta especialidá. Estes mesmes fontes coincidieron nel planteamientu d’esti colectivu y calificaron de “apañu” la disposición que facilita el que se pueda contratar a interinos insertaos en bolses d’otres especialidaes amás de la de llingua y considérenlo “inxusto y discriminatorio” pa los maestros interinos en llingua asturiana con más méritos nesa especialidá.

Maestros del colectivu que denunció en diversos medios de comunicación -ente ellos Asturnews- la so situación afirmaron desconocer el conteníu de les negociaciones sindicales inda non el fechu de que se tuvieren produciendo. Mentantu la reunión que teníen concertada col responsable de Recursos Humanos de la Conseyería d’Educación, Arturo Verano pa esta selmana, volvió aplazase y va entamase el prósimu xueves 14. Esti colectivu d’interinos sí llogró reunise col responsable del Serviciu de Personal d’Educación, al que-y espunxeron los sos esmolecimientos y ensin concretar respuesta dalguna a les demandes plantegaes, comprometióse a concertar la reunión de la prósima selmana. Los especialistes en llingua asturiana del colectivu d’interinos tán a la espera de los resultaos d’esa reunión pa decidir el determín que van tomar.

La situación que denunciaron estos maestros resúmese na disposición adicional añadía a la última convocatoria de listes de trabayu na que la Conseyería resérvase pa la especialidá de llingua asturiana la so facultá pa recurrir a interinos apuntaos a otres especialidaes.Los interinos especialistes en llingua asturiana afectaos por esta situación escepcional demanden la peñera de la llista de nueves contrataciones énte la sospecha de que pudiere haber contratos ensin tar inscritos nel rexistru col correspondiente certificáu de capacitación y piden la convocatoria pública d’una nueva bolsa pa la so especialidá.

Un grupu d’interinos cola titulación d’Especialistes en Llingua Asturiana denunció en diversos medios -ente ellos a Asturnews- la manera na que se ta procediendo per parte d’Educacion a les contrataciones de maestros d’asturianu pa Secundaria, ensin recurrir a la convocatoria de nueves llistes y utilizando un sistema qu’esti colectivu considera “escuru y nel que podía tar contratándose a persones ensin el certificáu de capacitación” pa impartir l’asignatura de llingua asturiana. Los afectaos tienen previsto acudir el prósimu miércoles 6 d’abril a una reunión colos responsables d’Educación pa tratar esti asuntu.

Según desplicó a Asturnews un portavoz d’esti colectivu d’interinos, que prefieren abellugase nel anonimatu hasta conocer los resultaos de la reunión colos responsables educativos del Principáu, les places d’asturianu en Secundaria taríen cubriéndose nesti momentu al través d’un procedimientu que nun ye’l mesmu col que se faen les nueves contrataciones nel restu d’especialidaes y ensin siguir el protocolu habitual de facelo nuna convocatoria pública, que garantice la tresparencia y oxetividá del procesu. Les consecuencies d’esti procedimientu escepcional pal asturianu son, según aseguró el portavoz d’esti colectivu, que pueda tar contratándose a maestros ensin la capacitación suficiente pa impartir l’asignatura de llingua en Secundaria col consiguiente deterioru pa la calidá docente de la materia impartida.

Una disposición adicional referida al asturianu y añedía a la resolución pola que se convocaben les nueves bolses d’interinos ye’l fundamentu llegal nel que se basa la Conseyería d’Educación pa contratar maestros procedentes d’otres llistes d’especialidaes, como se taría faciendo, según les sospeches y datos de los interinos especialistes en llingua asturiana que denuncien esta situación. Les contrataciones “fáense de manera particular, llamando por teléfonu a los candidatos, ensin publicar la convocatoria nel tablón d’anuncies d’Educastur, talo se fai col restu de contrataciones”, afirma’l portavoz del colectivu, pa quien esta situación d’escepcionalidá “ye una amuesa más de la consideranza que tien l’asturianu pa les autoridaes educatives”. Énte esti tratamientu escepcional pa cubrir les places d’asturianu en Secundaria el colectivu pide, en primer instancia, que se “peñere l’actual llista pa escluyir d’ella a toes aquelles persones que nun tean en posesión del certificáu de capacitación pertinente” y en segunda instancia que se convoquen nueves llistes onde los interinos cola especialidá de Llingua Asturiana puedan apuntase y acreditar los correspondientes méritos académicos. En referencia a les midíes propuestes nel recién aprebáu Plan de Normalización Social de la Llingua Asturiana el portavoz de los interinos declaró que la situación creada pola disposición adicional d’Educación “va totalmente contra les midíes propuestes nel Plan y contra la normalización del asturianu en xeneral, ya que’l riesgu y la evidencia d’ufiertar una calidá deficiente de la materia pola falta de capacitación de les persones contrataes”. Esti colectivu qu’axunta a unos venticinco interinos Especialistes en Llingua Asturiana tien concertada una reunión pal prósimu miércoles 6 col responsable de Recursos Humanos de la Conseyería d’Educación pa tratar del asuntu. Dependiendo de los resultaos d’esa reunión, el colectivu podía constituíse en plataforma pública pa movilizase pola igua de la situación en casu d’algamar una respuesta negativa a les sos reivindicaciones. Otres xestiones que tienen fecho hasta agora estos interinos pa tentar solventar la situación creada, como la d’informar a los sindicatos d’enseñanza alrodiu del problema, nun tienen algamao resultaos positivos. Nos sindicatos caltiénse una actitú que’l portavoz del colectivu calificó de “pasiva, ensin que paezan mui interesaos en solucionalo a nun ser de manera individual en cada casu reclamáu”.

La creación de la titulación de Filoloxía Asturiana puede ser un fechu si prosperen los proyectos elaboraos por varies comisiones d’espertos pal so estudiu na Axencia Nacional de la Evaluación de la Calidad y Acreditación(Aneca), l’organismu encargáu de coordinar llibros blancos nes universidaes españoles. Si esta propuesta de nuevu catálogu de titulaciones pa homologar los estudios superiores del estáu al espaciu européu algama’l vistu bonu del Ministeriu d’Educación la especialidá universitaria de Llingua y Lliteratura Asturiana sería una realidá.

Ente les comisiones d’espertos que trabayen na elaboración de llibros blancos p’adecuar la enseñanza superior al espaciu común européu el grupu encargáu de les filoloxíes propón la sustitución del títulu de Filoloxía Hispánica pol de Llingües y Cultures del Estáu, onde encaxaría la especialidá de Llingua y Lliteratura Asturiana.Nel documentu señálase que la condición de llingua non oficial nun ye obstáculu pa que los estudios de Filoloxía Asturiana tean a la par que les especialidaes nes otres llingües del estáu.

El proyectu de Llibru Blancu de les Filoloxíes ta pendiente de ser estudiáu na so totalidá pol Ministeriu d’Educación y si a la fin recibe’l so vistu bonu quedaría franca la puerta a la creación del títulu de Filoloxía Asturiana, una demanda hestórica de la Universidá d’Uviéu y de la sociedá qu’hasta agora foi tornada en repetíes ocasiones poles instancies centrales d’ordenación académica.

Según los planes previstos de l’Aneca el Ministeriu d’Educación tien d’aprobar el nuevu catálogu de titulaciones universitaries qu’homologa los estudios superiores al espaciu común européu.

La Conseyería de Cultura tien destinao un gastu por importe de venti mil euros pa subvencionar la edición de llibros de testu pa la enseñanza de l’asturianu na ESO. Les ayudes empobínense a editoriales privaes asturianes que presenten proyectos de material didácticu orixinales na nuestra llingua y que pol so interés y calidá contribuyan al arriquecimientu de la enseñanza del asturianau y de la cultura de la nuestra comunidá. Los proyectos tendrán presentase enantes del iniciu del cursu académicu 2005-2006.

Los proyectos de llibros de testu destinaos pa la enseñanza de l’asignatura optativa de Llingua Asturiana y Lliteratura van valorase atendiendo a los criteriso de calidá didáctico-pedagóxica y lliteraria del orixinal, ordenación y adecuación del conteníu, la so comprensibilidad, creatividá y aportación a la inonvacion educativa.

La convocatoria d’estes subvenciones apaez publicada nel BOPA con fecha de 28 de febreru y les solicitúes habrán presentase nel plazu d’un mes na Conseyería de Cultura.