La Xunta respalda a los especialistes d’asturianu énte posibles irregularidaes d’ Educación

El colectivu de maestros interinos especialistes en llingua asturiana que vien denunciando dende va meses la situación de la so asignatura en Secundaria y la manera escepcional cola que la Conseyería d’Educación cubre les places valeres, apareció esta mañana en públicu nuna rueda de prensa pa llamar l’atención sobre un problema, que los afectaos calificaron de “grave” y que cinca a la “mesma calidá d’enseñanza de l’asignatura”. Na rueda de prensa, el colectivu apaeció respaldáu pola Xunta pola Defensa de la Llingua Asturiana, la única organización qu’hasta agora-yos amosó el so apoyu esplícitu.

La comparecencia énte los medios, celebrada na sé de la Xunta en Gascona, ye la primera na que los maestros d’esti colectivu s’amuesen con nomes y apellíos y decidíos a facer pública la situación de l’asignatura de llingua asturiana en Secundaria énte la pasividá de l’Administración del Principáu por dar solución a esti asuntu. El portavoz del colectivu, el maestru y escritor Pablo Rodríguez Medina, remembró los pasos daos por esti grupu d’especialistes en llingua asturiana énte los responsables de la Conseyería d’Educación y la so falta de respuesta a les cuestiones planteaes: la principal, pa estos docentes, consiguir que la contratación pa cubrir les places valeres siga’l mesmu procedimientu que pal restu de les asignatures y non la manera escepcional cola que se vien entamando al traviés d’una disposición adicional de la Conseyería que refuga l’apertura de nueves llistes, como se fai coles otres materies.

Tanto Rodríguez Medina, como momentos enantes ficiera Arantxa, otra de les interines afectaes en declaraciones a Asturnews, quisieron resaltar que la situación d’escepcionalidá entamada por Educación ta llogrando “de mano que les contrataciones nun se fagan cola tresparencia necesaria pa cualquier contratación administrativa al nun ser pública la convocatoria de les mesmes y esto ta llevando a que se cubran places con persones que nun cuenten cola capacitación pa ello”, dalgo qu’a xuiciu de los maestros d’esti colectivu: “non namás ye grave como posible irregularidá sinón que ta afectando a la mesma calidá d’enseñanza de l’asignatura de llingua asturiana, porque amás puede dase’l casu de que persones que nun cuenten cola capacitación, a los dos años de siguir cola plaza podíen recibila ensin tener los méritos necesarios”. Les xestiones entamaes hasta agora polos interinos especialistes en llingua asturiana nun tienen llograo más que “vagues promeses y nenguna solución nin voluntá de que la hubiere” por parte de les autoridaes educatives, que según desplica Arantxa: “argumenten que’l problema ta en Madrid y non equí, como si en Madrid tuvieren mui procupaos pola asignatura de llingua asturiana y el tratamientu que tenga equí”. Los sindicatos d’enseñanza tampoco paecen “especialmente esmolecíos por buscar una solución”, afirma Arantxa que describe la situación planteada ente les organizaciones sindicales como “un pasase la pelota d’unos a otros, falamos con unos y dícennos una cosa y falamos con otros y dícennos dalgo completamente distinto, nesi sen sentímonos bastante desdexaos por parte de los sindicatos”.

El respaldu de la Xunta pola Defensa de la Llingua Asturiana a les denuncies del colectivu d’interinos especialistes d’asturianu ye l’únicu qu’hasta agora tienen consiguío de manera esplícita y pública, sicasí otres asociaciones tienen amosao’l so interés polos problemes d’estos maestros de Secundaria, ente elles l’asociación Oficialidá. Miembros del colectivu que tien denunciao les posibles irregularidaes d’Educación van caltener mañana una entrevista con representantes d’Oficialidá col fin de ver la posibilidá de recibir el sofitu y asesoriamientu xurídicu que l’asociación ufierta a ciudadanos y colectivos en defensa de los sos derechos llingüísticos.