Convocatories

Redacción.

Esti sábadu va inaugurase n’Uvieu PhotoLes, una esposición coleutiva ya itinerante que como diz l’epígrafe ‘Lesbianes retratando lesbianes’, ta compuesta d’una serie de semeyes de lesbianes feches por fotógrafes tamien lesbianes. La esposición va pasar per dellos llocales d’Uvieu a lo llargo de los meses de xunu y xunetu y ta organizada por ‘Tribadas’, el grupu de lesbianes de Xente Gai Astur (XEGA).

PhotoLes, ta yá na so segunda edición y surdió según los organizadores “de la necesidá de visibilizar al coleutivu lesbicu y mostrar la so riqueza y diversidá, los sos matices y contrastes, asina como sirvir de rampla de llanzamientu pa les fotógrafes”. PhotoLes va percorres, como fizo na so primer edición, sales d’esposición, centros de cultura, cafes y chigres de delles comunidaes autónomes.

N’Asturies va inaugurase mañana sábadu a les ocho la tarde nel Conceyu Abiertu, na cai La Gascona, 12 y ellí va tar del 11 al 28 de xunu, con horariu d’apertura de 18 a 22 hores. Darreu, ente’l 29 de xunu y el 15 de xunetu, va tar nel Llocal Cambalache, na cai Martínez Vigil, 30, abierta de llunes a vienres ente les 10 y les 13:30 hores y peles tarde de 16 a 20:30 hores.

Redacción.

El Museu del Pueblu d’Asturies de Xixón abrió estos díes el plazu p’apuntase a un cursín que va celebrase nel mes de xunetu. El títulu ye ‘Averamientu al baille asturianu’ y la profesora va ser Maribel López Parrondo. Con una duración de venti hores, el cursu ta abiertu a tolos públicos, “anque nun sepan un res de baille, ye cursu d’averamientu”, comenten los organizadores.

El plazu de matrícula ta abiertu hasta’l 15 de xunu y p’apuntase o recibir más información hai que dir a les oficines de la Universidá Popular de Xixón o llamar al telefonu 985 181 748.

Los conteníos del cursu van centrase en dos estayes, bailles y bailles-xuegu d’Asturies y sones y ritmos que los acompañen y la organización encamienta “trayer ropa cómodo y calzáu tipu playeros o asemeyao”, yá que’l cursu ye dafechu práuticu.

Redacción.

L’Ayuntamientu de Xixón caltien abiertu’l plazu p’apuntase al II Concursu de Baille por Pareyes, que va celebrase ente los díes 24 y 26 d’agostu na Plaza Mayor de la Villa de Xovellanos. El plazu va tar abiertu hasta’l 13 de xunetu pa toles pareyes de baille que quieran apuntase.

Les bases del concursu afiten que cada categoría del concursu tien una pieza obligatoria. El xiringüelu na categoría infantil, La xota asturiana pa la xuvenil y una muñeira de llibre eleición pa los adultos. Amás recuerda que los participantes tienen de llevar el traxe tradicional asturianu.

Los premios son tres por cada categoria. Nel infantil va de los 100 a los 400 euros, nel xuvenil el primer premiu llega a los 500 euros, suma que na categoría d’adultos llega a los 900 euros. P’apuntase ha llevase una ficha colos datos personales y una fotocopia del DNI al Departamentu de Festeyos del Teatru Xovellanos de Xixón, na cai Cabrales 86.

Redacción.

Esta primer fin de selmana del mes de xunu llega enllena d’actividaes d’ociu. El vienres la FNAC de Parque Principáu va celebrar un conciertu del grupu ‘No apto’ a les 18:30 hores. Nel mesmu van presentar el so discu nuevu ‘Voces’. Esi mesmu día, na Llibrería La Central va tocar el ‘Dúu Mestura’, qu’a primeros d’esti mesmu añu punxo na cai’l so primer trabayu discográficu ‘Agua del norte’.El conciertu, de baldre, va ser a les 19:30 hores y van presentar los temes del so discu, que tán n’asturianu, n’eonaviegu y en castellán y utilicen basicamente la guitarra y les voces del dúu.

El sábadu nel Centru Muncipal Xixón-Sur y dientro de la habitual programación de cine, va pasase la película ‘Le petit lieutenant’. La película pertenez a ún de los más esllumantes y cercanos exemplos de ‘polar’, como se conoz al xeneru negru frances. Esti actu organízase en collaboración cola Alianza Francesa. La película, dirixida por Xavier Beauvois en 2005 cunta la hestoria d’Antoine, recien salíu de l’Academia de Policía que llega a París pa integrase na 2ª división de Policía Xudicial. Caroline Vaudieu, de vuelta al serviciu dempues de salir del alcoholismu, escueye al xoven teniente pa formar parte del so equipu nuna unidá d’elite, “La Criminal”.

Amás el vienres en Xixón, nel Centru Cultural Caxastur ‘Colexata San Xuan Bautista’, el grupu ‘Provisional Danza’ va amosar l’espectáculu ‘40 tipos de vodka’. N’Uvieu, nel Centru Cultural Caxastur San Franciscu 4 va reprentase’l sábadu la obra ‘Para cuándo son las relaciones diplomáticas’ de Teatro Norte.

La Universidá d’Uviéu organiza, dientru la so programación de verano, un cursu qu’ufierta de baldre siguir el Festival de Lorient con abellugu y gastos pagos, faciendo práctiques periodístiques nel Festival Bretón y nel Festival d’Avilés. “Periodismo cultural e información local: La crónica cultural” ye’l títulu d’una experiencia na que s’inclúin les práctiques nel Festival bretón n’agostu depués de desendolcase n’Avilés del 23 al 28 de xunetu.

Pa inscribise nel cursu ye requerimientu tener conocimientos d’inglés o de francés, pero por 317 euros de matrícula inclúi una selmana de cursu n’Avilés, coincidiendo col Festival Intercélticu avilesín, y 10 díes en Lorient, colos gastos pagos, coincidiendo col Festival Intercélticu que dirixe l’asturianu Lisardo Lombardía, anñas del tresporte hasta la ciudá bretona. Los dos Festivales son l’abellugu de les práctiques de crónica periodística cultural del cursu nuna experiencia pionera na Universidá d’Uviéu ya inclusu n’España de cursu de calter internacional.

El cursu amás ye homologable por 4,5 créditos de llibre configuración nos expedientes d’enseñances reglaes y por 3 créditos de Formación Permanente al Profesoráu Non Universitariu del Principáu d’Asturies n’activo.

Información del cursu na web d’Uniovi

L’Academia de la Llingua entrego esti vienres los premios d’investigación y lliteratura que convoca cada añu. L’actu celebróse¡l vienres nel Hotel NH Principado a les doce del meudía. Y foi ellí onde se ficieron públicos los fallos de los distintos xuraos que l’Academia formó pa otorgar los premios, que n’ediciones pasaes ganaron escritores ya investigadores como Xose Nel Riesgo, Pablo Rodríguez Medina, Enrique Carballeira, Berta Piñán o Dolfo Camilo Díaz ente munchos otros.

Los premios de l’ALLA foron na estaya de recoyida de material toponímico oral pa Inaciu Galán y Marta Carbajal pol so trabayu sobre la parroquia de La Collá (Siero), con accesits p’Andrea Duque ya Ignacio Santos, Carlos Suari y Xulio Llaneza polos trabayos sobre Santiagu d’Aces (Candamu) La Xungarosa, El Pozón y Villalegre (Avilés) y Tolivia (Llaviana). Quedó ermu’l de recoyida oral de léxicu asturianu, mientres que nel d’investigación llingüística’l premiu foi pa Pablo Suárez por un Diccionariu Politécnicu d’asturianu y hebo un accesit pa Xose Arsenio Coto por “L’asturianu, llingua del sieglu XXI”. Nel concursu d’investigación sobre lliteratura Ramiro González Delgado llevó los 600 euros del premiu por “la lliteratura grecollatina en llingua asturiana”, mientres que’l veteranu Miguel Solís Santos foi’l ganador nel certame de llectures pa rapazos con “Nosotros, los pexes”. Nel concursu de creación, l’entregúin Pablo Rodríguez Medina foi’l ganador cola obra “El Santu”.

Per otru llau, l’ALLA convoca agora darréu de la entrega un concursu de ‘Recoyida de Material LliterariO Oral’ y el Premiu “Federico G.-Fierro Botas”, un concursu de recoyida de material lliterario escrito.

En cuantes a los premios lliterarios, l’ALLA convoca tolos años los premios de ‘Llectures pa rapazos’, ún pa los neños de primaria y otru pa los de secundaria y bachiller. Amás convoca’l premiu de creación “Llorienzu Novo Mier” de novela, que l’añu pasáu ganó l’escritor Xose Nel Riesgo. Amás l’Academia va entregar el premiu de ‘Testos Teatrales’ y de ‘Curtios Cinematográficos’, los más nuevos.

Redacción.

Mañana vienres a les 19:00 hores nel Salón d’actos de la Casa la Cultura ‘Teodoro Cuesta’ de Mieres, l’asociación H.a Xareos, editora de la revista de lliteratura moza Formientu va presentar el segundu numberu de la revista, un especial de narrativa “colo meyor que dan de si les lletres más moces”. L’actu ye l’últimu de los programaos pa presentar esti númberu especial dientro de la XXVIII Selmana de les Lletres Astrurianes. Na presentación van participar los escritores Ismael González Arias y Humberto González como presentadores.

La revista ñació l’añu pasáu “cola idea d’espublizar a los autores más mozos que taba dando de sí la lliteratura asturiana” y esti segundu númberu faise coincidiendo cola Selmana de les Lletres con un formatu especial. Cuasi 150 páxines onde apaecen cerca d’una ventena d’autores. La revista tien un prólogu institucional de Ramón d’Andres, otru del so direutor, Inaciu Galán y completase colos cuentos y biografíes de los autores y un álbum de fotos de presentaciones anteriores.

Los autores qu’apaecen son: Ricardo Candás, Pablo Texón, Jose Ángel, Pablo Rodríguez Medina, Jorge Fernández García, Hector Perez Iglesias, Xabel Llano, Pablo Rodríguez Alonso, Elizabeth Felgueroso, Pablo X. Suárez, Iris Díaz, Diego Aldebarán, Xabel de Cea Gutierrez, Xaime Menendiz Llope, Sergio Gutierrez Camblor, Benxa Perez, Inaciu Galán y González, Nicolás V. Bardio y Mino Álvarez.

Redacción.

La Oficina de Política Llingüística del Gobiernu d’Asturies y el Conceyu de Castropol entamen na Casa Cultura d’esti conceyu, la II Xornada de Toponimia del Navia-Eo cola idea “d’acercar a los propios vecinos les decicisiones sobre la oficialización de los topónimos d’esta fastera occidental d’Asturies”.

Nel marcu d’esta Xornada, la Xunta Asesora de Toponimia d’Asturies va presentar un infome sobre’l nome qu’ha recibir la Ría del Eo, pal que se creo una ‘Comisión pral Estudio da Denominación da Ría’ formada por Mónica Loza López, Ramón Martínez Castro, Alfredo González y Víctor Manuel Díaz Díaz.

El programa de los actos entama a les 17:30 del vienres cola presentación de la II Xornada y un alderique “Os nomes dos nosos sitos”, onde van participar delles autoridaes municipales y autonómiques. A les seis de la tarde va presentase la publicación ‘Actas das I Xornadas de Toponimia del Navia-Eo’, un llibru que recueye les intervenciones de los especialistes que l’añu pasáu participaron en La Caridá na primera Xornada. Finalmente, a les seis y media, presentase l’Informe sobre’l nome de la Ría del Eo.

Redacción.

Güei sábadu, a les ocho la tarde, na Sala 2 del Auditoriu Príncipe Felipe d’Uvieu presentose’l númberu ventidós de la revista ‘Asturies. Memoria Encesa d’un País’. La revista, Editada pola Fundación Belenos, lleva más de diez años averando a los asturianos a la conocencia de la hestoria propia, de les sos tradiciones y vezos, asina como a la reconstrucción de la memoria del pueblu asturianu.

Son miembros del conseyu de redacción d’esta revista Inaciu Llope, psiquiatra, escritor y portavoz de partíu Izquierda Asturiana, asina como Xose Nel Riesgo, xeógrafu y escritor, ente otros.

Redacción.

Güei pela mañana, Carlos Alba ‘Cellero’ va percorrer les escueles públiques del conceyu de Llangreu con ‘Cuentos pa bebes’, un cuentacuentos fechu pa los más pequeños que va desenrollar a les 9:30 hores na Escuela ‘Rapacinos’ de Sama y a les 11:30 na Escuela ‘Pinín’ de La Felguera. Yá a les 19:30 hores, na Casa Cultura ‘La Escribana’ en Lluanco, el monologuista va realizar un espectáculu de monólogos pa tolso públicos.

Al mesmu tiempu, a les 20:15 hores, Toli Morilla va dar un conciertu nel Teatru Nuevu de La Felguera, nel que presentará’l cantar que consiguió’l Primer Premiu al Meyor Cantar en Llingua Asturiana, creáu esti añu pola Conseyería de Cultura, Comunicación Social y Turismu.

Toli Morilla presenta’l so discu ‘Entropía’ qu’inclúi catorce temes con lletra d’escritores como Luís García Montero, Xuan Bello, David González, Pablo Texón, Elías Veiga, Pablo R. Medina, Xuan Santori, Marta Mori, Elvira Laruelo, Aurora G. Rivas y el desapaecíu Mánfer de la Llera.

Páxina oficial de Toli Morilla