Convocatories

Redacción.

Güei na Casa Cultura ‘La Escribana’ en Gozón, va celebrase un taller de monologuismu pa neños de los IES de Lluanco y Candás de nueve la mañana a tres de la tarde. Yá pela tarde, na Casa de la Mocedá en Sotrondio va celebrase la presentación del segundu númberu de la revista Formientu, cola participación del escritor Chechu García, el responsable del Serviciu de Normalización Llingüística del conceyu, Pablo Rodríguez Medina y dalgunos autores d’esti segundu númberu. L’actu va entamar a les seis y media la tarde.

Ayeri en La Pola Siero, la xornada tuvo dedicada a los neños del conceyu, cola organizción pol coleutivu ‘El Llar’ d’una yinkana lliteraria y la presentación del segundu númberu de la revista Formientu na Casa Cultura, arropada pol músicu Nacho Fonseca y los escritores Xuan Santori, Sidoro Villa, Ruben Sánchez Antuña, el responsable del Serviciu de Normalización Llingüística de Siero, Xose Firmu, el direutor de la publicación, Inaciu Galán y dellos autores de la revista, ente los que taben Diego Aldebarán, Sergio Gutierrez, Ruben d’Areñes, Xaime Llope y Jorge Fernández.

Mañana, nel Teatru Municipal de L’Entregu, a les siete y media la tarde va facese una llectura dramatizada del testu de Pablo Rodríguez Medina, ‘El Santu’, a cargu del coleutivu sociocultural de muyeres ‘Les Filanderes’.

Redacción.

A lo llargo de tol día de güei, nes llibreríes y tiendes de discos d’Asturies va celebrase’l Día del Llibru y el Discu n’Asturianu con un descuentu del 10% na compra d’estos productos culturales y el regalu d’un llibru, ‘La emancipación de la lliteratura asturiana’, coordináu por Xose Lluis Campal.

La celebración, cola que se zarra la XXVIII Selmana de les Lletres Asturianes, consigui que les ventes de llibros n’asturianu xuban considerablemente nesi día y afalar el conocimientu de la nuesa lliteratura como un productu cultural d’importancia.

Les llibreríes onde va celebrase esti ‘Día del llibru y el discu n’asturianu’ puen atopase n’Uvieu, Xixón, Aviles y Mieres, amás d’otros negocios de L’Entregu, L’Infiestu, Siero, Nava, Llaviana, Corvera, Villaviciosa y Llangreu. Los llectores del oriente podrán acudir a tiendes de Cangues d’Onís, Llanes y Les Arriondes, na zona occidental pue consiguise’l descuentu en llibreríes de Cangas del Narcea, Tineu, Cuideiru o L.luarca.

Redacción.

La Tertulia Feminista Les Comadres apaez nel añu 1986 cola idea d’afalar la igualdá de les muyeres, la so participación na vida pública, el trabayu por una educación non sexista y la espublización y difusión de trabayos sobre la muyer, amás del caltenimientu de la tradicional fiesta de Les Comadres, con gran vitalidá en Xixón.

La Tertulia Feminista Les Comadres organiza una conferencia d’Esperanza Bosch Fiol, de la Universidá de les Islles Baleares, na que va falar sobre ‘La construcción de la masculinidá y la feminidá’. Bosch Fiol ye Doctora en psicoloxía y profesora titular d’hestoria de la psicoloxía. Nos últimos años realizó investigaciones sobre tresmisión del estereotipu femenín y la so rellación coles creencies misóxines.

L’actu va celebrase güei, xueves 26, a les ocho la tarde na Sala de Conferencies del Centru Cultura Antiguu Institutu de Xixón.

Páxina oficial de Les Comadres

Redacción.

El novelista Edward Rosset, d’ascendencia inglesa pero ñacíu nel País Vascu va presentar güei en Cangues d’Onís la segunda parte de la triloxía dedicada a los reis asturianos, ‘Tierra quemada’ y va facelo de la mano de Francisco Pantín, de l’Asociación Cultural Abamia.

El segundu llibru de la triloxía discurre na dómina que va dende Fruela a Mauregato y sigue’l camín de la primer novela. Pero nun ye la única novela hestórica d’esti prolíficu autor vasco-ingles. Dalgunes de les sos obres más conocíes son ‘Los navegantes’, dedicada a Magallanes, Elcano, Urdaneta y Legazpi, ‘Rumbo a Cipango, dedicada a Cristóbal Colón o ‘Los Viracochas’ con Francisco de Pizarro como protagonista de la hestoria.

Edward Rosset ñaz n’Oñate (País Vascu) en 1938 y tien espublizaes más de doscientos llibros, ente lliterarios y de testu, trabayu al que dedicó munchos años. La presentación de ‘Tierra quemada’ va ser na Casa Cultura de Cangues d’Onís a les ocho la tarde de güei.

Páxina oficial d’Edward Rosset (cast.)

Redacción.

En 1995 la UNESCO aprobó’l 23 d’abril como ‘Día Internacional del Llibru’ pa conmemorar los llibros y los drechos d’autor. La fecha escoyóse pola coincidencia nesi día de la muerte de Cervantes y William Shakespeare, ente otros autores. Dende entós la celebración foi garrando puxu y güei celebrase en tol mundiu.

N’Asturies son munchos los actos que van celebrase nesti día. El Colexu Jacinto Benavente de Xixón entrega güei a les doce la mañana nel Centru Muncipal de Vega-La Camocha, los premios del XI Concursu Lliterariu ‘Pin de Pría’, autor al que darreu van facer homenaxe. Per otru llau, na biblioteca d’El Fontán d’Uvieu va celebrase a la mesma hora una llectura de testos narrativos na que va poder participar cualesquier persona que s’acerque hasta ellí.

L’Entregu, Llanes y munchos otros conceyos van celebrar tamien dellos actos a lo llargo del día y les celebraciones van siguir esta selmana con conferencies, presentaciones de llibros y llectures, amás del tradicional descuentu del 10% nes llibreríes.

Páxina de la UNESCO sobre’l Día Internacional del Llibru (cast.)

Redacción.

L’asociación Xente Gai Astur convoca un concursu de rellatos qu’aborden la temática GBLT y que nun sobrepasen les seis fueyes, pudiendo presentalos n’asturianu o en castellán. Va valorase na eleición de los ganadores, la calidá lliteraria y la visión positiva que se dea del coleutivu homosexual.

Y como ye tamien habitual, XEGA convoca un concursu de cartelos p’anunciar el Día Internacional. El cartelu tien de llevar el testu «28 de xunu. Día internacional de gais, lesbianes, transexuales y bisexuales». Y el lema d’esti añu ye ‘Agora Europa: la igualdá ye posible’.

Bases completes

Redacción.

La Xunta pola Defensa de la Llingua Asturiana (XPDLA) y Xunta Moza organicen pal próximu día 28 d’abril el so tradicional ‘Conciertu pola Oficialidá’, qu’esti añu llega a la so edición númberu diecinueve con un cartelu mui ambiciosu, onde apaecen los grupos y artistes asturianos de más esitu.

El conciertu va facese nel aparcamientu del estadiu Carlos Tartiere, onde va instalase una carpa xigante y dos escenarios independientes nos que van dir alternándose les actuaciones de: Tuenda, Llangres, Dulcamara, Lafu y Rebeca Velasco, Toli Morilla, Chalaneru Soundsystem, K-Nalón y Skama la Rede

El conciertu va entamar a les 19:30 y va durar más d’ocho hores ensin descansu gracies a los dos escenarios nos que van alternándose los artistes. La xornada quier sirvir pa llamar l’atención sobre’l problema llingüísticu n’Asturies. Les entraes tán a la venta al preciu de 5 euros y a 6 euros na puerta.

Más información:

Redacción.

Esther García, llicenciada en Pedagoxía, profesora d’enseñanza secundaria y esperta en Filoloxía Asturiana presenta’l so trabayu últimu, ‘Toponima de La Montaña (Valdes)’. L’actu va ser esti domingu a la 1 la tarde na Ilesia parroquial de Belen, nel conceyu de Valdes. García ye autora d’una bayurosa obra lliteraria y de didáutica de l’asturianu.

Destaquen ente los sos llibros ‘Llingua asturiana y práutica simulativa na E.X.B.’ o’l poemariu ‘L.luribaga’, amás ye miembru de l’Academia de la Llingua Asturiana y collabora como articulista na edición avilesina de La Nueva España.

La publicación d’esti cartafueyu de toponimia inxerase dientro de la Coleición Toponimia de l’Academia de la Llingua y que llega yá a los 112 númberos. Esti volume van presentalu, xunto a l’autora, l’alcalde de Valdes Juan Fernández, l’academicu Roberto González Quevedo y el párrocu de La Montaña, Jesús Emilio Menendez.

El Conseyu de la Mocedá d’Asturies pon en marcha un concursu de propuestes artístiques sobre “Mocedá y sexualidá” nel que se pretende reflexar como vive, espresen, siente la sexualidá la mocedá a través de diferentes manifestaciones artístiques. La sexualidá entendida como una fonte de relación, de comunicación y de placer ente les persones. Esti concursu tien cinco categoríes: cartel, video, fotografía, relatos eróticos y música.

Van poder participar mozos y moces d’ente 14 y 30 años. En cauna de les categoríes van establecese dos grupos un de 14 a 18 años y otru de 19 a 30 años. Cada participante va poder presentar tres obres inédites como máximu pa caunda de les categoríes. Les bases completes pueden vese equí.

L’asociación cultural “El Portón” y l’asociación xuvenil “El Tragaluz” convoquen la XIV edición del concursu de Cuentos pa Rapacionos y Xóvenes d’Asturies. La participación nesti concursu ta abierta a toles persones que tean interesaes. El plazu pa entregar los orixinales acaba’l 23 d’abril, los testos han unviase al apartáu 140 d’Uviéu a nome de l’asociación cultural El Portón.