Convocatories

El Muséu Etnográficu del Oriente d’Asturies tien abiertu’l plazu pa presentar semeyes al so I concursu de semeyes antigües. Les meyores semeyes qu’espeyen tradiciones y cambios sociales del pasáu y d’anguañu van recibir premios de 200 euros por categoría.

Nel concursu pue participase con semeyes que recueyan cualquier actividaes que tuvieren llugar nel oriente asturianu, especialmente les que cinquen a elementos del patrimoniu históricu y cultural, los llabores, les fiestes y tradiciones. Hay cuatro estayes temátiques premiaes con 200 euros cada una: familia, trabayu, fiestes y paisaxe y arquitectura. Aparte d’estes categoríes convócase un premiu especial de 300 euros a la meyor semeya pola so antigüedá orixinalidá o aporte históricu.

Les semeyes han presentase acompañaes de los datos del propietariu o autor, enantes de la reunión del Xuráu, que va ser el 20 de xunetu. Nun hai tope nel númberu de semeyes que puen unviase, siempre que sían inédites.

El Muséu Etnográficu de Porrúa ñaz gracies a la donación, en 1994, de la finca y cases de Llacín, cedíes al pueblu por doña Teresa Sordo Sordo y don Luis Haces Sordo, fíos de Porrúa y residentes en México. La donación estimuló la creación de l’Asociación Cultural Llacín, que decidió promover, crear y xestionar un muséu etnográficu, col oxetu de dar a los bienes donaos una finalidá cultural y recreativa; iguóse un conxuntu d’edificaciones rurales coles que se consiguieron unos 400 metros cuadraos de superficie espositiva. Les cases que formen el muséu tán dispuestes en dos fileres paraleles xuníes per un corredor voláu de madera.

Los edificios del muséu tan nuna finca d’ocho díes de gües acondicionada como parque públicu, con una amplia representación d’árboles frutales y de viesca. Ente los árboles destaca la presencia monumental d’un aguacate que se trexo de México y se llantó en 1906. El perímetru del tueru na actualidá ye de 7,43 metros.

El día 10 de xunetu del 2000 inauguróse’l “Muséu Etnográficu del Oriente d’Asturies”, nel barriu Llacín de Porrúa. Inaugurólu’l presidente del Principáu. La obra promovióla l’Asociacion Cultural Llacín y remataron asina siete años de trabayu de l’asociación.

Web del Muséu

Redacción.

L’Alcuentru Internacional de Mocedá ‘Cabueñes 07’ tien abiertu’l plazu d’inscripición hasta’l 24 d’agostu. Los actos van tener llugar nel Centru de Cultura Antiguu Institutu de Xixón ente’l 24 y el 28 de setiembre. La cuota p’apuntase ye de 41 euros, 82 con agospiu. Pa los portadores del carne mozu estes cuotes son de 21 y 41 euros respectivamente
.
Esti añu, na edición de los Alncuentros de Cabueñes 2007 va haber seminarios participativos y talleres prácticos, ente los que destaquen los seminarios ‘Entendiendo la web social. Comunicación y participación na sociedá de la información’, ‘La mocedá ente los nuevos cambios nel Estáu de Bientar’, ‘El futuru d’Europa y el papel de los xóvenes na construcción europea’ o ‘Tiempu llibre y participación xuvenil: balance d’una decada y retos de futuru’.

Ente los talleres destaquen ‘Pon un blogue na to vida’, ‘¿Na to uiqui o na mía? Multimedia 2.0’, ‘Empleate n’Europa. Educación pa la participación’, ‘¡Nun mos mires, xúnete!. Ferramientes pa la participación xuvenil’, ‘Ferramientes d’evaluación nos programes de mocedá’ y un ‘Taller de práctiques d’igualdá’.

www.cabuenes.org

Redacción.

El Museu del Ferrocarril inaugura mañana una esposición sobre la tarxeta postal titulada ‘La estación na tarxeta postal’. L’actu va cuntar cola presencia del nuevu conceyal xixones d’Educación y Cultura, Justo Vilabrille, y del director de la Fundación Municipal de Cultura, Educación y Universidá Popular, Julián Jimenez y va entamar a les 19.30 hores.

‘La estación na tarxeta postal’ percorre postales onde apaecen estaciones de tol mundiu, con una escoyeta d’unes 350 postales. La mayor parte d’elles son del primer terciu del sieglu XX, epoca dorada d’estes tarxetes. Nestes postales pue vese la vida cotidiana de ferroviarios, viaxeros y habitantes de cada sitiu.

El material vien d’un na so mayor parte d’una colección particular, mientres que un pequeñu porcentaxe ye del fondu de postales del Museu del Ferrocarril de Xixón, ún de los más importantes d’Europa.

1. Participantes:

Van poder participar persones de cualquier nacionalidá, de forma individual o coleutiva, que, a la fecha d’entrega de los trabayos tengan cumplíos los 14 años.

2. Tema y Formatu:

El tema va ser llibre, pero tanto los personaxes como los guiones y aspeutu final han ser ineditos y orixinales y han presentase en formatu DIN A-4. Los dibuxos van poder facese tanto en blancu y negru como en color, emplegando la tecnica que se vea más afayadiza. La estensión nun tien llende.
Los testos han tar escritos n’asturianu. Nesti sen, a pa estimar la obra, el xuráu va valorar los trabayos en so conxuntu, illustración y testu, pero dando mayor importancia al testu lliterariu.

3. Entrega

Los trabayos han entregase en Serviciu de Normalización Llingüística de la Mancomunidá de la Comarca de la Sidra na Cai Escueles de Paraes, n u 47 – 33529 Nava, o bien nes Oficines d’Información Xuvenil de la Comarca, Cai La Laguna, baxos 33520 – Nava y Centro Cultural San Juan de Capistrano C/ Asturias 22, 33300 Villaviciosa. Han de presentase nun sobre zarráu que nel so interior recueya los datos personales: nome y apellíos, direición, telefonu, títulu y seudónimu, y copia del DNI o tarxeta residente.
El plazu pa presentar los trabayos va finar el 15 de Payares de 2007 (inclusive)

4. Fallu del Concursu

El xuráu va tar formáu principalmente por creativos, artistes y ilustradores cualificaos, periodistes y profesores d’asturianu. El so fallu va ser públicu y inapellable, comunicándolu direutamente a los concursantes premiaos y a los medios de comunicación autonómicos.

5. Premios

El xuráu va conceder los siguientes premios:
-.Un primer premiu de 500 € al meyor trabayu presentáu.
-.Dos accesit de 200 € caún pa los dos trabayos finalistes.
(premios suxetos a les correspondientes retenciones fiscales).

6. Otros

Delles obres seleccionaes van formar parte d’una esposición que va viaxar polos diferentes centros culturales de la Comarca la Sidra. Nel mesmu sen, la organización va editar una publicación coles obres premiaes.
Finada la esposición los trabayos van ser devueltos a los autores que lo soliciten.
La organización d’esti concursu reserva’l derechu d’usar pa dalgún tipu de material promocional, los dibuxos presentaos, faciendo referencia al autor.

La participación nesti concursu supón la total aceutación de les presentes bases.

Redacción.

Güei 28 de xunu a les ocho la tarde va celebrase l’Actu Políticu-Institucionall del ‘Día Internacional de Lesbianes, Gais, Transexuales y Bisexuales’ n’Asturies. L’actu va entamar col saludu de representantes de fuercies polítiques, sociales, sindicales y institucionales, pa dempues facer entrega de los premios ‘28 de xunu’: Triángulu Rosa y Lladrieyu Rosa 2007. Too ello va ser nel Salón d’Actos del Antiguu Institutu Xovellanos de Xixón.

Darreu del actu, va haber una manifestación, hacia les 9 la nueche. La marcha va salir de la Plaza’l Parchís, xunto al Centru de Cultura Antiguu Institutu, y va llegar hasta’l Paseu Begoña, llugar nel que va procedese a la llectura d’un manifiestu por mor del 28 de xunu de 2007, que lleva esti añu’l lema ‘Agora Europa: La Igualdá ye posible’.

Yá mañana, van siguir los actos. Y a les ocho la tarde va celebrase’l Recital poeticu: ‘Día l’Arguyu’, cola llectura de poesía y rellatos gailesbicos per parte del Grupu de teatru ‘Otra Tierra’, nel Llocal Cambalache, na cai Martínez Vigil 30 d’Uvieu. Xega ufierta pal sábadu unos autobuses pa dir a la minifestación de Madrid, qu’esti añu acueye la convocatoria europea per primer vegada.

Xega va otorgar a Gustavo Bueno’l Lladriyu Rosa

Redacción.

Nel centru d’arte de La Llaboral de Xixón va tar abierta la propuesta espositiva de ‘Feedback’, que según los organizaodre “ta centrada nel arte que respuende a instrucciones, a inputs o al so entornu, ufiertando una posibilidá narrativa a la multiplicidá d’hestories del arte que recurren a la tecnoloxía dixital como sofitu”.

La esposición enllaza dos temes venceyaos al arte “reactivu”: unu qu’indaga nel conceptu de feedback dende la creación artística basada n’instrucciones hasta llegar al arte que planteguen los sistemes abiertos que reaccionen a los inputs del esterior. L’otru esplora’l conceptu de la lluz y la imaxe en movimientu dende la imaxe cinetica y l’Op art hasta los plantegamientos reactivos de la televisión y el cine”.

L’amuesa nun quier facer un repás hestóricu, sinón amosar una esbilla de les obres más destacaes, diverses idees rellacionaes ente sí. Tan espuestes en conxuntos temáticos o pareyes ramificaes ya interconectaes. Ente los artistes presentes na esposición podemos atopar a Manfred Mohr, Vera Molnar, Charles Csuri, Sol LeWitt , Casey Reas, Roman Verostko, 5voltcore, Harold Cohen, Christa Sommerer & Laurent Mignonneau, Hans Haacke, Edward Inhatowicz, David Rokeby , Lygia Clark, Hachiya Kazuhiko, Robert Rauschenberg, Eddo Stern y a Mary Flanagan ente otros.

Redacción.

Güei xueves 21 y mañana vienres va celebrase la II Amuesa d’Arte Urbanu ‘Ciudá d’Uvieu’ qu’organiza l’Asociación Cultura Nosepara. L’horariu de les actividaes va ser de seis de la tarde a les doce la nueche na Plaza’l Sol, onde van desenrollase delles disciplines artístiques.

Va haber capoeira, break dance, risoterapia, teatru y performance, graffiti, talleres de malabares y de didgeridoo, el minutu de gloria o ‘talent show’, onde, según los organizadores, “caún va poder demostrar eso que sabe facer”. Tamien va celebrase una batukada y un gran cículu de percusión, cola participación de tou aquel que crea tener un mínimu sentíu del Ritmu.

Los actos van rematase con malabares con fueu y munches coses más. La organización quier ‘convidar a tolos uviedinos a divertise y participar nesta II Amuesa d’Arte Urbanu’.

Redacción.

El Museu del Pueblu d’Asturies de Xixón amplia’l plazu p’apuntase a un cursín que va celebrase nel mes de xunetu. El títulu ye ‘Averamientu al baille asturianu’ y la profesora va ser Maribel López Parrondo. Con una duración de venti hores, el cursu ta abiertu a tolos públicos, “anque nun sepan un res de baille, ye cursu d’averamientu”, comenten los organizadores.

El plazu de matrícula taba abiertu hasta’l 15 de xunu pero ta acabante d’ampliase hasta’l 22 de xunu. P’apuntase o recibir más información hai que dir a les oficines de la Universidá Popular de Xixón o llamar al telefonu 985 181 748.

Los conteníos del cursu van centrase en dos estayes, bailles y bailles-xuegu d’Asturies y sones y ritmos que los acompañen y la organización encamienta “trayer ropa cómodo y calzáu tipu playeros o asemeyao”, yá que’l cursu ye dafechu prácticu.

Redacción.

L’Ayuntamientu de Xixón convoca un añu más el Concursu de Gaita de Xixón, que va celebrase na villa de Xovellanos los díes 25, 26 y 31 de xunetu y l’1 d’agostu na Plaza Mayor. El plazu p’apuntase termina’l 13 de xunetu y les categoríes son, amás de pola edá, ‘gaita solista’, ‘gaita y tambor’ y ‘pareyes instrumentales’, onde s’almite qu’acompañe a la gaita un pianu, clarinete, vigulín, curdión y xiblata ente otros.

La Banda de Gaites Noega coorganiza esti Trofeu de Gaites Noega que permite la inscripción de gaiteros d’hasta 16 años na categoría infantil y de cualesquier edá na d’adultos. En casu d’haber munchos participantes en dalguna de les categoríes va facese una preselección a puerta pesllada.

Los premios van dende los 300 euros del primer premiu infantil a los 900 de les pareyes instrumentales. El xuráu va dar anuncia de los finalistes el día 30 de xunetu. Los ganadores van conocese nel Día d’Asturies en Xixón, el 5 d’agostu. La entrega de los galardones va ser el domingu 12 d’agostu, nel marcu de la Selmana Grande de Xixón. Pa más información pue llamase al Teatru Xovellanos, al telefonu 985 182 929.

Redacción.

La Conseyería de Cultura, Comunicación Social y Turismu abrió apocayá’l plazu pa presentar obres al ‘XXVIII Premiu Xosefa Xovellanos’ de novela, ‘XIII Premiu Xuan María Acebal’ de poesía, ‘XIII Premiu Máximo Fuertes Acevedo’ y el ‘IV Premiu Enriqueta González Rubín’ de periodismu. Los premios tienen una dotación de 7.000 euros pal ganador, menos el de periodismu, que tien un premiu de 3.000 euros.

La fecha tope pa presentar obres ye l’1 d’ochobre. Los premios del Principáu son los más prestixosos de la lliteratura asturiana. Autores como Dolfo Camilo Díaz, Xuan Xose Sánchez Vicente, Miguel Solís Santos, Antón García, Esther Prieto o Xilberto Llano ganaron n’otres ocasiones el premiu de novela. El de poesía ganáronlu autores como Martín López-Vega, Milio Rodríguez Cueto, Pablo Antón Marín Estrada o Xuan Bello.

El premiu d’ensayu ganáronlu Inaciu Iglesias, Ramón d’Andres o Milio Rodríguez Cueto n’ediciones anterioes. En cuantes al premiu de periodismu, el que lleva menos ediciones, foi algamáu por Beatriz R. Viado, Ismael González Arias, Inaciu Galán y González y Cristobal Ruitiña ente otros.

Bases completes