Rodrigo Cuevas presenta l’adelantu del so “Prince of Verdiciu”

Esta selmana yá ta disponible y a la vienta en plataformes dixitales, Verdiciu, de Rodrigo Cuevas, una tema que forma parte de “PRINCE OF VERDICIU” un EP con cuatro canciones qu’en próximes feches va tar nes tiendes y que ye la revolución musical asturiana d’esti 2016.
Diba tiempu que nun se paría en Asturies un hit como’l que nos ocupa, que va faer sigún la compañía de discos, qu’esti branu sía inolvidable: “un temazo pa gayola de tola flora y tola fauna que la so interpretación nel programa Cantadera de TPA va algamar llueu’l millón de reproducciones. Bendita llocura, increíble pandemia”. Con eses pallabres faise anuncia del adelantu del EP “Prince of Verdiciu” nel que’l tema estrella ye esta versión anovada del clásicu Soy de Verdiciu, nun mix d’españar con la hai más d’una década popular “Reina de la Noche”.

Apocayá Rodrigo Cuevas actuó nel programa Luar de la televisión gallega cola banda La Kadarma faciendo-y compaña, nuna repetición de la so aparición estelar y primera en ‘Cantadera‘, un nomáu programa de la televisión pública d’Asturies onde esti mozu que vive nuna aldega pontevedresa revolucionó a tolos asturianos. Presentose en ropa interior, cola so camiseta de “Asturies underground”, lligueru, medies, faxín, pantuflas de cuadros y madreñes y agora presenta esa mesma imaxe nel so EP que recién apaecerá n’Asturies.