Red Hot Chili Peppers anuncia xira n’España na seronda

Red Hot Chili Peppers van volver a España de xira y van facelo en Madrid, el 27 de setiembre nel Barclaycard Center Palaciu de los Deportes, y el 1 d’ochobre nel Palau Sant Jordi de Barcelona.

Les entraes podrán adquirise a partir de les 10:00 hores del próximu 1 de xunu, al traviés de doctormusic.com y ticketmaster.es, tamién en Fnac, Viaxes Carrefour y Ferre Viaxes, ente otros puntos.

Doctor Music alvierte, ante’l discutiniu xeneráu pola vienta d’entraes pa los conciertos de Bruce Springsteen, que ta “prohibida la reventa” y que la organización “nun se fai responsable de l’autenticidá de les entraes adquiríes en cualesquier otru puntu de vienta ensin autorizar”.

El preciu de les entraes pa Madrid va ser de 50, 65, 75 y 90 euros pa les entraes d’asientu reserváu en grada, y 65 Euros pa pista. Pa Barcelona’l preciu va ser de 50, 60, 65 y 90 euros pa les entraes d’asientu reserváu en grada, y 65 Euros tamién pa pista (gastos de distribución ensin incluyir).

Red Hot Chili Peppers anunció va dos selmanes que va publicar el so undécimu discu d’estudiu, The Getaway (Warner), tres cinco años dende’l postreru -I’m with you-, el próximu 17 de xunu.

L’álbum ta producíu por Danger Mouse y entemecíu por Nigel Godrich y yá se conoz el primera single, Dark Necessities, disponible en toles plataformes dixitales. Con cada entrada mercada pa los conciertos de Madrid y Barcelona incluyiráse un códigu col que, a partir del 17 de xunu podrá descargase el discu o consiguir una copia física de The Getaway.