Ramón d’Andrés tercia na polémica del RIDEA

Nuna carta empobinada al presidente del RIDEA (Real Insituto d’Estudios Asturianos) el Xefe de la Oficina de Política LLíngüística, Ramón d’Andres, entrúga-y “qué razón se pue manexar pa refugar l’usu del asturianu nuna actividá pública” como’l Congreso de Estudios Asturianos; y diz que s’entiende menos “cuando se comprueba que nes condiciones pa presentar les ponencies y comunicaciones, nun se diz nada sobre la llingua qu’ha utilizase”. D’Andrés ufre la so collaboración pa iguar el problema.

Na carta, Ramón d’Andrés diz empobinase al RIDEA por recibir “el 20 de marzu pasáu, carta de Dª María Yolanda Magdalena Montes, con domiciliu en Llangréu, que se dirixe a min pa esponer lo qu’ella camienta que ye una conculcación del so derechu al usu del asturianu nel Congreso de Estudios Asturianos” y por mor d’ello, na so condición de Xefe de la Oficina de Política Llingüística del Principáu, y con tou respetu, faiga les siguientes considerances:

–L’artículu 4 del Estatutu d’Autonomía d’Asturies diz que «el bable gozará de protección» y que «promoveráse’l so usu». –La Llei 1/98 de 23 de marzu, d’Usu y Promoción del Asturianu, refierse nel preámbulu al «vomentu, la protección y el caltenimientu » del asturianu, y tamién al oxetivu de «la recuperación, caltenimientu y promoción del bable y les sos variantes». Nel artículu 1 reitera les mesmes intenciones de protección y promoción del mandáu estatutariu. De mou más concretu, nel artículu 3 dizse que l’oxetu de la Llei ye «a) Amparar el derechu de los ciudadanos a conocer y emplegar l’asturianu y establecer los medios que lo faigan efectivo»; y «d) Asegurar el so llibre usu y la non discriminación de los ciudadanos por esti motivu». De mou inequívocu, la Llei dexa establecío nel artículu 4 que «1. Tolos ciudadanos tienen derechu a emplegar l’asturianu y a espresase nél de fala y per escrito. 2. Tendrá por válidu a tolos efectos l’usu del asturianu nes comunicaciones orales o escrites de los ciudadanos col Principáu d’Asturies».

–El Plan de Normalización Social del Asturianu 2005-2007, aprobáu por unanimidá na Xunta Xeneral del Principáu, espresa en preámbulu ún de los sos oxetivos: «Fomentar progresivamente l’usu institucional y públicu per parte de les alministraciones».

Amás, la llinia d’actuación primera, referida a l’«Alministración y Organismos del Principáu d’Asturies», espón como oxetivu xeneral: «Fomentar progresivamente l’usu institucional y públicu del bable o asturianu, y del gallego-asturianu o fala del occidente d’Asturies, nel ámbitu de l’Alministración y órganos del Principáu d’Asturies».

Ye claro que siendo’l RIDEA una entidá cultural adscrita a la Comunidá Autónoma al traviés de la Conseyería de Cultura, Comunicación Social y Turismu, esto ye, un organismu del Principáu d’Asturies, ha axustase al nuestru ordenamientu llegal en materia d’usu llingüísticu. Nun se ve, polo tanto, qué razón se pue manexar pa refugar l’usu del asturianu nuna actividá pública entamada pola entidá qu’usté dirixe y titulada «Contreso de Estudios Asturianos»; y entiéndese menos cuando se comprueba que nes condiciones pa presentar les ponencies y comunicaciones, nun se diz nada sobre la llingua qu’ha utilizase.

En resultes, y d’acuerdu cola llexislación vixente, entiendo que la institución qu’usté dirixe ta obligada a respetar el derechu a usar l’asturianu, y qu’esi usu, si nun interfier n’otros derechos, nun pue ser fonte de conflictu nin de conculcación. En tou casu, esta Oficina de Política Llingüística ta dispuesta a collaborar con usté na solución d’esti problema.