Rajoy nun ve cine español y Bayona consideralo “un despreciu”

El director J.A. Bayona, unu de los favoritos de cara a la próxima edición de los Premios Goya con “Una bisarma vien veme”, reprochó güei al presidente del Gobiernu, Mariano Rajoy, la so “falta d’interés” nel cine español.

“Un presidente que nun ve’l cine que se fai nel so país nun ye por falta de tiempu sinón d’interés. Un despreciu impensable n’otros países”, aseguró Bayona nun tuit.

El cineasta reaccionó asina a les declaraciones efectuaes esta mañana por Rajoy nuna entrevista n’Onda Cero na qu’aseguró nun ver nenguna de les películes qu’aspiren anguaño a los Goya. “Nun les pudi ver, pa la mio desgracia nun voi al cine, lleo noveles”, dixo’l presidente del Gobiernu na citada entrevista.

Con una recaldación de 26 millones d’euros y 4,5 millones d’espectadores, “Una bisarma vien veme” foi la película más taquillera l’añu pasáu n’España, percima de cualesquier superproducción de Hollywood, y atropa 12 nominaciones pa los Goya.

Otres de les favorites, como “L’home de los mil cares” d’Alberto Rodríguez, sobre’l exespía Francisco Paesa o “Tarde pa la roxura”, l’aclamáu debú de Raúl Arévalo, con once nominaciones caúna, tán disponibles yá en plataformes “online”.

En 2016 el cine español meyoró abondo con una recaldación de más de 109 millones d’euros y 18,14 millones d’espectadores. La cuota de pantalla foi del 18,1 %, el cuartu meyor datu históricu.