PlayPresta llanza’l primer concursu de youtubers n’asturianu: “Yes Youtuber!”

La canal PlayPresta y la productora Cuatro Gotes Producciones vienen acabante convocar el concursu ¡Yes youtuber! de youtubers n’asturianu, p’afalar y visibilizar l’usu del asturianu en toa triba de videos en formatu de programes per internet.

La canal quier descubrir y dar a conocer talentos nuevos qu’apaecen ente la mocedá y tamién ente la xente d’otres edaes y por mor d’eso tien el concursu abiertu a toles propuestes posibles, dende opinión a entretenimientu, pasando per videotutoriales, telerealidá, ficción y otres propuestes nueves o formatos recuperaos y adaptaos al mediu dixital.

Pa participar han presentase videos de menos de 5 minutos que podrán mandase n’archivu o colgase en plataformes como YouTube de forma pública o privada. Amás, alredor d’esti concursu, la plataforma PlayPresta tien previsto organizar actividaes de difusión y visibilización de los proyecos presentaos n’institutos y eventos culturales.

El xuráu va tar formáu pol equipu técnicu de PlayPresta, asina como por presentadores de la canal y otres persones venceyaes al audiovisual asturianu y a la normalización llingüística. Van valorase la calidá de los conteníos, l’inxeniu y la orixinalidá, ensin tener en cuenta la calidá técnica de forma preminente, pero sí la calidá llingüística del asturianu utilizáu (a nivel fonéticu, léxicu, sintácticu, etc.), asina como l’interés normalizador y la potencialidá pa llegar a la mocedá de la propuesta. Van valorase tamién les dotes interpretatives o comunicatives y l’aprovechamientu de los recursos propios del llinguaxe audiovisual y la so capacidá d’incidencia nel públicu.

El plazu pa inscribir los videos nel concursu ¡Yes youtuber! ye hasta’l 15 d’abril del 2019 a les 23.59 y la participación ta abierta al ámbitu internacional y ye de baldre. Les persones participantes tienen d’inscribise al traviés del formulariu que figura na web www.playpresta.com/yesyoutuber Cada autor o autora, individual o colectivu, pue inscribir tantos videos como quiera. Nel momentu de la inscripción l’autor o autora tien d’escoyer la categoría na que quier inscribise.

El concursu tien estayes escolares, de mocedá y d’adultos, con premios en toes elles, ente los que ta la grabación d’una temporada completa con medios profesionales nes instalaciones de Cuatro Gotes Producciones o nel centru educativu participante, llotes de productos culturales n’asturianu, asina como 150 euros pal casu de los premios p’adultos.

D’ente toles categoríes, van otorgase amás les siguientes reconocencies a la eficiencia comunicativa, a la calidá técnica, a la calidá llingüística y a la orixinalidá