OSLIN-AST: un flexonador interactivu qu’amuesa les variaciones gramaticales y formales d’una palabra n’asturianu

OSLIN-AST ye’l nome d’una nueva ferramienta llingüística d’usu llibre n’Internet que vieno acabante de ponese estos díes a disposición de los falantes ya investigadores por mor del trabayu que desendolcaren dos instituciones: la Universidá d’Uviéu (al traviés del Seminariu de Filoloxía Asturiana) y l’Institut Universitari de Lingüística Aplicada (IULA) de la Universitat Pompeu Fabra de Barcelona. Trátase d’un flexonador de palabres, esto ye, una base de datos interactiva que muestra toles variaciones gramaticales y formales que caúna de les palabres de la llingua asturiana pue tener, d’acordies cola normativa del estándar académicu.

La dirección d’OSLIN-AST ye: http://ast.oslin.org/ y nella puen facese dende yá consultes de toa mena y atopar información complementaria sobre’l proyeutu y le diverses fontes lexicográfiques asturianes, amás del Diccionariu de la Llingua Asturiana (DALLA) qu’emplega.

Cómo s’usa OSLIN-AST:

●FLEXONADOR DE PALABRES. Escribiendo una palabra, OslinAst ofrez la so flexón, esto ye, toles variaciones gramaticales y formales: variaciones de xéneru, de númberu, de conxugación verbal. Amás, remite a una palabra que se garra como modelu flexivu, y ofrez la llista de toles palabres que siguen la mesma flexón. Cuando una forma coincide con dos o más palabres, ofrez la flexón de toes eses palabres. Informa tamién de si esa palabra ta nel diccionariu de l’Academia de la Llingua, col qu’hai un enllaz.

●CONXUGADOR DE VERBOS. OslinAst ye, na práctica, una gran base de conxugación de verbos asturianos.

●DICCIONARIU INVERSU DEL ASTURIANU. OslinAst Busca tamién llistes de palabres qu’entamen, acaben o contienen una secuencia de lletres escoyida. Na práctica, fai de diccionariu inversu o de terminaciones.

OSLIN AST ye un gran corpus léxicu de la llingua asturiana, desendolcáu dientro’l proyectu OSLIN coordináu por Maarten Janssen y pol Institutu de Llingüística Aplicada de la Universidá Pompeu Fabra de Barcelona (IULA), n’andecha col Seminariu de Filoloxía Asturiana (Departamentu de Filoloxía Española) de la Universidá d’Uviéu, coordináu por Ramón de Andrés Díaz.

OSLIN AST básase nel Corpus AsturNeo (CAN), ellaboráu por Observatoriu de Neoloxía y Terminoloxía de la Universidá d’Uviéu (AsturNeo). El CAN contién un ampliu repertoriu léxicu obteníu de diverses fontes lexicográfiques de referencia (lleer más) y de les bases de datos del propiu AsturNeo y del corpus Eslema (dirixíu por Xulio Viejo Fernández). Esti léxicu trátase, nel so casu, d’acordies coles pautes normatives establecíes nel Diccionariu de la Llingua Asturiana (DALLA). Les flexones léxiques desendolcóles l’equipu del AsturNeo d’acuerdu coles ferramientes y la estructura del OSLIN. Indícase si les palabres tán o non nel DALLA.

Esti corpus léxicu ta tovía en procesu d’ellaboración.

Enllaz del proyeutu