Miguel Solís Santos presenta la tercer edición de la hestoria d’Avilés en cómic

El Club de Prensa de La Nueva España organiza na Casa de Cultura d’Avilés la presentación de la tercer edición de la Hestoria d’Avilés, en cómic, güei, xueves, día 17 d’avientu, a les ocho la tarde. Na mesma van participar Pilar Varela, alcaldesa d’Avilés; David Careaga, editor; José Manuel Feito, hestoriador, y l’autor, Miguel Solís Santos.

Esta obra cunta la hestoria d’esi conceyu ilustrada en 226 viñetes, distribuyíes en 52 páxines, dende’l Paleolíticu hasta la construcción del Centru Niemeyer. Esta tercer edición trai cinco páxines nueves con venticinco viñetes inédites que recueyen los socedíos más importantes dende 1992 (fecha de la última edición) al presente.

Nelles cuéntase la reconversión d’Ensidesa, les crisis económiques de los noventa, la «Marcha de Fierro», l’espoxigue cultural, el plan integral de depuración de la ría, los descubrimientos arqueolóxicos del castiellu de Gauzón, los trunfos deportivos de mayor sonadía, les fiestes y certámenes o la meyora del entornu. La primer edición d’esta obra foi en 1985, con una segunda en 1992, hasta llegar a esta tercera que se presenta agora na ciudá que protagoniza la hestoria de les sos páxines.