Migoya avala énte’l Parlamentu el prestixu de los designaos pal conseyu de la tv autonómica

Son profesionales de prestixu y, poro, nun deben ser cuestionaos. La Conseyera de Cultura y Comunicación Social, Ana Rosa Migoya, defendió güei, nuna comparecencia énte la Xunta Xeneral, la idoneidá de los nueve candidatos qu’integrarán el conseyu d’alministración de la futura radiotelevisión autonómica asturiana. El PP ratifica que nun entrará nel conseyu al entender que l’ente de comunicación supón un marafundiu de perres públiques.

Nengún argumentu nuevu. Dende’l Gobiernu sustentáu pol pactu ente PSOE ya Izquierda Xunida-Bloque por Asturies deféndese la cualificación de los nueve profesionales que tendrán capacidá decisoria nel futuru ente públicu, pesie a que la llista yá foi cuestionada pola presencia de persones con fuerte vinculación política y por incluyir a sólo un espertu en Comunicación, el caderalgu Bernardo Díaz Nosty.

Dende’l frente contrariu, el Partíu Popular insiste na aporfiadura que paralizó durante meses la puesta en marcha de la tv, y ratificó güei en boca’l so voceru, Fernando Goñi, que nun nomará a los conseyeros que-y correspuende designar porque ve nel futuru ente de comunicación un marafundiu inxustificáu de caudales públicos.

A esi yá vieyu argumentu, Migoya replicó afirmando que los créitos pa la puesta en marcha de la radiotelevisión autonómica alpenes superen el 1 por cientu del presupuestu’l Principáu pa 2005, y defendió l’allugamientu de l’ente públicu na Universidá Llaboral de Xixón como una midida qu’economiza costes.

Depués d’un llargu camín d’engarradielles ente partíos políticos -y tamién nel sen de la propia Federación Socialista Asturiana-, nel que llegaron a intervenir los sucesivos Gobiernos centrales del PP y el PSOE, la radiotelevisión autonómica asturiana nacerá ‘de facto’ del prósimu 2 d’avientu, fecha señalada pa l’aprobación na Xunta Xeneral del Principáu de la constitución del conseyu de la tv colos nueve candidatos propuestos.

Sedrán representantes del PSOE nel conseyu d’alministración los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez y el caderalgu Díaz Nosty. Por Izquierda Xunida-Bloque, sedrán conseyeros el profesor de Drechu Constitucional Benito Aláez y el escritor n’asturianu y técnicu cultural Adolfo Camilo Díaz.