Mieres convoca un concursu de rellatos pa escolinos de secundaria

La conceyalía de Cultura de Mieres, al traviés del Serviciu de Normalización Llingüística, convocó l’I «Concursu de Rellatos Curtios pa Escolinos de Secundaria Conceyu de Mieres». Al certame podrán presentase mozos d’ente 12 y 18 años de cualquier nacionalidá y residencia. Los rellatos van ser de temática llibre y tendrán de tar escritos n’asturianu, con una estensión de non más de trés fueyes en formatu A4 por una sola cara y escritos a ordenador.

Los trabayos van apurrise na Casa de Cultura Mieres, per corréu electrónicu a la dirección llingua@ayto-mieres.es o per corréu postal. El plazu pa presentalos va tar abiertu hasta’l 30 de payares. Los premios del certame van consistir en llotes de llibros y discos en llingua asturiana y, amás, los trabayos gallardonaos van espublizar nel llibru de les fiestes de San Xuan 2013. Pa cualesquier información adicional, los interesaos pueden ponese en contactu col Serviciu de Normalización Llingüística de Mieres nel teléfonu 985 450 666.