Martin Scorsese va dar clases de cine per internet

El director estadounidense Martin Scorsese va impartir un cursu de cine per internet que va tar disponible a partir del próximu añu al traviés de la “startup” MasterClass, informó esti vienres la edición dixital de Variety.

El cursu va costar 90 dólares (unos 75 euros) y va dexar un accesu ilimitáu a un total de venti llecciones impartíes en vídeos. Neses clases, el director neoyorquín va analizar toa’l so filmografía y va ufiertar datos sobro les sos esperiencies detrás de les cámares, incluyíes llecciones sobro narrativa, montaxe y trabayu con actores. Amás, va dexar la descarga d’un llibru con resumes de cada llección y material adicional.

Los estudiantes van poder unviar vídeos con entrugues al realizador, y Scorsese va dar respuestes a los asuntos de mayor interés. MasterClass, fundada en 2015, llanzó hasta la fecha más d’una docena de cursos sobro cine por Internet, dalgunos cola firma d’artistes como Kevin Spacey, Dustin Hoffman, Aaron Sorkin o Steve Martin, ente otros.