Martha High preside’l cartelu del IV La Grapa Black Music Festival d’Avilés

La poderosa y carismática presencia de Martha High preside’l cartelu del IV La Grapa Black Music Festival actuando’l sábadu 11 col so grupu The Soul Cookers nun programa que completen JP Bimeni & The Blackbelts, Watchout, The Slingshots, The Agapornis y Aretha Soul Dives & The Silverbacks.

Tamién el sábadu, Juno & Darrell van protagonizar una sesión vermú, y Zulu Men, una sesión musical de tarde. Antes de cada conciertu, y nel cambéu de bandes, van pinchar los DJ’s Corao y Chofo, David Roman, Miguel Ángel Sutil, DJ Mosk y DJ Miguel Arias

La Grapa Black Music Festival convirtióse, por derechu propiu, n’una de les principales referencies pa los aficionaos a la música negra nel norte d’España y n’unu de los más importantes del país. Forma parte del programa musical de la conceyalía de Festexos d’Avilés pal mes d’agostu, con mediu centenar actuaciones programaes.

La carismática presencia d’una de les reines del soul, Marta High, mientres trés décades vocalista d’un iconu universal como James Brown, preside cola so poderosa voz un certame que vuelve tener el Parque del Muelle como centru de xunta en dos nueches de música en directu, para esfrute llibre y gratuitu. Nesta edición con un sellu inclusive más bailladeru y festivu, un perfil nel que coinciden los grupos participantes, hasta bien entrada la madrugada del vienres 10 y el sábadu 11 d’agostu.

El Parque del Muelle tresfórmase, per segundu añu consecutivu, na escena perfecta pala celebración d’una fiesta alredor de los estilos que configuren la música negra nacida n’Estaos Xuníos, gracies a les bandes de soul, blues, funk y R&B, referencies nacionales ya internacionales, que componen el festival avilesín. Con grandes novedaes, como son les actuaciones de DJ’s nel quioscu del parque al empiezu de cada conciertu y nel intercambiu de bandes, y la suma’l sábadu 11 d’una sesión vermú y una sesión de tarde musical.

Más información