Marina apurre al Gobiernu’l so llibru blancu sobre l’oficiu docente

El filósofu y pedagogu José Antonio Marina apurre güei al Ministeriu d’Educación el borrador del llibru blancu de la función docente que’l ministru Íñigo Méndez de Vigo encagara-y n’ochobre.

Marina, esplica nel so blogue dedicáu a la creación del citáu borrador que’l documentu tenía que tar termináu a finales d’esti mes pa qu’intervenga “nel alderique educativu de la campaña electoral”.

Fuentes del Ministeriu d’Educación hicieron l’anuncia de que’l ministru nun va presentar en públicu’l llibru blancu, que “ye una aportación más”, sinon colgar na web “una propuesta inicial pa ser aldericada, completada, refugada o aceptada”.

Nel índiz del documentu apaecen capítulos dedicaos a “la necesidá de tresformar” la escuela española, la revisión de les reformes que tuvieron ésitu pa “aprender d’elles” o’l papel del docente y de el directores “como centru” del cambéu educativu. El diseñu d’una carrera docente, cómo faer curiosu l’oficiu p’atraer a los meyores; condiciones llaborales; selección y formación inicial de los docentes o la formación siguida son dellos aspeutos a tratar.

José Antonio Marina cree esencial reparar al profesor na aula por que sepa cómo enseña y aprienda a ameyorar, daqué que se fai en tol mundu, pero qu’equí “paez un pecáu”, aseguró apocayá nuna entrevista. El borrador de Marina foi revisáu por espertos independientes, “en que’l so xuiciu y conocencia” confía esti pedagogu, aprofia nel so blogue.