Los menores d’equí son los que menos ciberacosu sufren

España ye unu de los países con menor tasa de ciberacosu ente los menores de 18 años anque ye unu de los más concenciaos na denuncia d’esti fenómenu.

Ente los paises del primer mundu, solo’l 8% de la mocedá español sufrió dalguna vegada ciberacosu, frente a la media del 18% na OCDE, pero de los que se ven sometíos a esti tipu d’ataques el 71% cuntalo a sos padres.

España tien una de les tases más baxes del mundu desarrolláu d’agresiones al traviés de medios dixitales y redes sociales, y unu de los que más concenciaos, sigún conclúi una encuesta realizada pola Fundación Vodafone nel pasáu mes de setiembre ente 5.000 mozos y moces d’ente 13 y 18 años en 11 países (España, Reinu Xuníu, Alemaña, Italia, Holanda, Grecia, Irlanda, República Checa, Suráfrica, Nueva Zelanda y USA).

El porcentaxe de la mocedá español que sufrieron ciberacoso ye’l más baxu xunta la República Checa ente tolos países del estudiu, que ta encabezáu por Nueva Zelanda (30%), EE UU (27%), Irlanda (26%) y Suráfrica (24%).

España tamién ocupa unu de los llugares más baxos na percepción d’esti fenómenu. Asina, a la entruga de que si’l mozu oyó qu’otra persona sufrió ciberacosos, un 63% de los mozos españoles respuende afirmativamente frente a la media del 70%. Sicasí, de los mozos qu’afirmen sufrir ciberacosu n’España, un 71% d’ellos compartieron colos sos padres el problema, frente al 57% de media del conxuntu de los encuestaos, siendo’l porcentaxe más altu de tolos países.

Los tipos de ciberacosu que sufrieron los mozos españoles encuestaos son de distintes tipoloxíes. La escusa más común qu’utilicen los sos agresores ye l’apariencia o l’aspeutu física (38%), siguíu del sexismu (27%), homofobia (21%), racismu (19%), clasismu (14%), discriminación relixosa (10%) y por razones d’edá (10%).