Los institutos culturales europeos algamaron el Príncipe d’Asturies de Comunicación y Humanidaes

La candidatura que se barruntaba como favorita p’algamar el Premiu Príncipe d’Asturies de Comunicación y Humanidaes foi la qu’a la fin recibió los parabienes del xuráu. Los grandes institutos europeos, dedicaos a difundir la llingua y el patrimoniu vivu de los sos respectivos ámbitos culturales, representen “un instrumento de fomento del diálogo y de afirmación de la identidad de los pueblos en el actual marco de la globalización”.

La candidatura reconocida col Premiu de Comunicación ya Humanidaes tien nome colectivu, el de seis instituciones europees col mesmu fin: difundir les llingües propies más alló de les llendes xeográfiques y polítiques. L’Alliance Française, el British Council, la Societá ‘Dante Alighieri’, el Goethe Institut, l’Institutu Camoes y l’Institutu Cervantes, a xuiciu del xuráu: “tresmiten al mundu la cultura y los valores humanísticos y democráticos d’Europa y apoyen la difusión de la producción artística más vanguardista de los sos países nel restu del mundu”.

El xuráu d’esti premiu taba presidíu por Manuel de Olivencia y formábenlu Carmen Alborch, Lluis Xabel Álvarez, Ignacio Bayón, Raúl Bocanegra, Alejandro Echevarría, Javier Gómez Cuesta, Javier González Ferrari, Manuel Lombardero, Jorge Lozano, Catalina Luca de Tena, Beatriz de Moura, Elena Ochoa, Pedro Páramo, Alberto Pico, Ernesto Sáenz de Buruaga, José Antonio Sánchez, Ricardo Senabre, Jesús de la Serna, Enrique Ybarra y Juan Luis Iglesias Prada (secretariu).

De les instituciones premiaes la más antigua ye l’Alliance Française, fundada en 1884 y que tuvo ente los sos directores a personalidaes del mundu de la cultura francesa como Louis Pasteur, Ernest Renan, Julio Verne y Armand Colin. Síguele n’antiguedá la Societá ‘Dante Alighieri, fundada en 1899 por un grupu d’intelectuales esmolecíos pola difusión de la llingua y la cultura italianes. El British Council entamó la so andadura en 1934, concebíu como un órganu internacional pa promover los valores de la democracia parlamentaria frente a la amenaza del fascismu emerxente n’Europa per aquellos años. El Goethe Institut, ye una entidá creada n’Alemania en 1951 y como les otres instituciones premiaes combina na so razón de ser el fomentu de la llingua y la cultura del ámbitu xermánicu col de la tresmisión de valores humanísticos y democráticos. Les dos instituciones más nueves son l’Institutu Cervantes d’España y l’Institutu Camoes de Portugal, entidaes creaes en 1991 y 1992, col fin de promocionar l’español y el portugués pel mundu.

A esti premiu concurríen un total de 24 candidatures procedentes d’Alemania, Arxentina, Australia, Bulgaria, Colombia, Estados Uníos, Francia, Italia, México, Paraguay, Perú, Polonia, Portugal, Reiu Uníu y España. Ye’l segundu de los ocho Premios Príncipe d’ Asturies que van concedese esti año, nel que cumplen el so venticinco aniversariu. Enantes concedióse’l Premiu de Cooperación Internacional a la ex presidenta del Parlamentu Européu, Simone Veil. Nes prósimas selmanes van fallase los correspondientes a Ciencies Sociales, Lletres, Investigación Científica y Técnica y Artes. Los Premios Príncipe d’Asturies de Concordia y Deportes fallaránse el prósimu mes de setiembre.