Los hermanos Valle Roso, Marisa y Fernado estrenen so discu de forma oficial esti sábadu nel Nuevu Teatru La Felguera

Los hermanos Valle Roso, Marisa y Fernado, estrenen discu de forma oficial esti sábadu 28 de febreru nel Nuevu Teatru La Felguera.

Un pasu más ye’l títulu del primer y esperáu discu de los hermanos Valle Roso, Fernado y Marisa. Un pasu más ye un trabayu musical nel que les dos promeses más nueves de la tonada asturiana reinterpreten esti xéneru en clave de jazz, ensin escaecer les bases de l’asturianada dialogada que con tantu xeitu executaran, nel pasáu, Agustín Argüelles y Diamantina Rodríguez.

Les notes jazzístiques –a cargu del pianu de Xaime Arias– entemécense nun trabayu onde rescamplen la evolución de les lletres y les temátiques nueves de los cantares qu’apaecen nesti cedé. Les lletres de les canciones, firmaes por autores como Ismael Arias, Antón García o Carmen López, suponen un soplu d’aire nuevo pa los cantaores de tonada del sieglu presente. Marisa Valle Roso y Fernando Valle Roso van tar acompañaos nesta presentación en La Felguera por. Xaime Arias al pianu, Jorge Cambareli a la batería, Óscar Santos al baxu, Sara Illana a la flauta, Pablo Carrera a la gaita y Alejandro Lafuente a la guitarra. El Nuevu Teatru La Felguera va acoyer la presentación d’esti trabayu musical el próximu sábadu 28 de febreru a les 20:15 hores.