Los Berrones axunten a deportistes d’alta competición na grabación d’un tema alusivu

‘Cantaes’ deportives, pero dientro d’un estudiu. Los miembros del grupu Los Berrones dirixeron ayeri la grabación d’un tema alusivu al deporte que la cadena llocal ‘Tele Oviedo’ emitirá en formatu de videoclip y al que-y pusieron voz, ente otros deportistes d’alta competición, l’árbitru Enrique Mejuto González, el piragüista Manuel Busto y los futbolistes Samuel, Pablo Álvarez, Paúl y Borja Sánchez.

Nuna sesión cellebrada nos estudios Eclipse, más de dos decenes de deportistes dexáronse guiar polos integrantes de Los Berrones na grabación del tema ‘Por deporte’, que la banda podría incluyir en futuros trabayos discográficos y que, según les previsiones, sonará en directu nuna gala solidaria que se cellebrará la prósima selmana n’Uviéu.

Los Berrones superen les 10.000 copies vendíes del so últimu discu asoleyáu, un cd grabáu en directu n’agostu pasáu na xixonesa playa de Poniente y nel que la parte musical ta completada con imáxenes en dvd y un diccionariu ‘berronil’ de términos emplegaos pola banda.

Finalistes del concursu de maquetes de Radio Asturias en 1988, Los Berrones saltaron darréu a la fama col premiu d’esi certame: La grabación d’un ‘single’ nel que s’incluyeron los temes ‘Tais de yogur’ y ‘Nun yes tú’ -primer gran ésitu del pop-rock n’asturianu- y qu’escosó dos tiraes acabante ser editáu.

En mayu de 1989, la banda de Tolivia asoleyó’l so primer discu de llarga duración, ‘Voi dicítelo’, que popularizó la música en llingua asturiana a niveles hasta entós inéditos al traviés d’un singular amiestu de modernidá sonora y raigañu rural. Nos siguientes cuatro años, Los Berrones editaron tres trabayos más -‘Si rompe, que rompa’, ‘¿Lo tuyo cómo ye?’ y ‘No, home, non’- y somorguiáronse llueu nun silenciu que nun frañeron hasta 1998, cola publicación del so quintu cd, ‘Da-y fuerte’.

Los dos últimos trabayos editaos pola banda antes de publicar el so primer directu foron el recopilatoriu ‘Diez años berrando’ (1999) y ‘República Independiente de Tolivia’ (2003).