Cuatro yacimientos con güelgues de dinosauriu aspiren a ser reconocíos como Patrimoniu de la Humanidá

Les pisaes dexaes polos dinosaurios n’Asturies quieren ser Patrimoniu de la Humanidá. Los yacimientos xurásicos de Tazones, La Griega, Tereñes y la playa de Ribesella entren nuna llista xunta otros 31 conxuntos asemeyaos del Estáu pa reclamar la másima reconocencia de l’Axencia de les Naciones Xuníes pa la Educación y la Cultura, la Unesco.

Asina, tres conceyos repártense la presencia de la candidatura: Villaviciosa, Colunga y Ribesella, municipios que centralicen el caltenimientu, dientro d’Asturies, de güelgues de dinosauriu. De fechu, Colunga acueye’l Muséu’l Xurásicu, equipamientu que dende la so apertura al públicu na primavera pasada convirtióse nel centru museísticu más visitáu del Principáu.

La llista na que figuren los yacimientos xurásicos asturianos deberá agora pasar un primer corte nel que la Unesco fadrá una esbilla d’alredor de mediu cientu de candidatures. A partir d’esa selección, que vendría a suponer una ‘almisión a trámite’, l’alta axencia de la ONU decidirá si reconoz o non el conxuntu xurásicu ibéricu como Patrimoniu de la Humanidá, ensin un plazu determináu.

Nos primeros meses de 2004, la Unesco yá recibió un primer espediente cola candidatura de los yacimientos xurásicos, qu’agora se reenvía a l’axencia de Naciones Xuníes incluyendo nueva documentación ya incorporando encamientos de los propios técnicos de la Unesco.