Los Alcuentros de Música Electroacústica 2017 entamen con un taller de “Creación de preseos musicales y controladores”

La sala conferencies del Centru de Cultura Antiguu Institutu va acoyer esti miércoles, 15 de marzu a les 20 hores un taller  de “Creación de preseos musicales y controladores”. Nesta charra falarase sobre la filosofía del Do It Yourself (DIY) y vse aprender a entamar un proyectu de construcción d’un preséu musical y otros accesorios útiles pal músicu.

Dende la esperiencia de más de 12 años de trabayu, l’inxenieru de Sonido José Castellanos (profesor del CIFP de Comunicación Imaxe y Soníu de Llangréu – CISLAN) va amosar la so metodoloxía, técniques y creaciones rellacionaes col mundu de la música y l’electrónica.

La filosofía del Failo tú Mesmu ye un movimientu qu’inspira, xune y comunica a miles de siguidores en tol mundu al traviés d’Internet, siendo les sos premises básiques crear, aprender y compartir la to esperiencia. Si quies empezar a construyir preseos musicales y equipos electrónicos ven y xúnite a la comunidá DIYer.

Programa:

• La busca d’inspiración
• Fases d’un proyectu de construcción
• Herramienta de diseñu y simulación
• Técniques de contrucción y luthería básica.
• Técniques de montaxe electrónicu.
• Axuste y calibración
• Estudio de proyectos terminaos (Controladores MIDI, guitarra eléctrica, violín eléctricu, etc.)

José Javier Castellanos Teyeru ye Inxenieru técnicu en Telecomunicación pola especialidá de Soníu ya Imaxe y anguaño imparte Técniques y Procedimientos d’Imaxe y Soníu nel CIFP CISLAN. Amás de la docencia, desenvuelve’l so llabor como investigador nel campu de la Instrumentación y l’Acústica Aplicada según na creación de ferramientes de software enfocaes a la emulación del soníu directu como’l Emumix.