L’Observatoriu fai balance de la política llingüística nel 2005

L’Observatoriu presentó ayeri en rueda de prensa l’informe ellaboráu por esti “órganu asesor de política llingüística” pa valorar los avances que se fixeron nel últimu añu sobre les actuaciones previstes nel Plan de Normalizacion del Asturianu. Na rueda de prensa, na que tuvieron tres de los sos miembros, Xuan Bello, Vanessa Gutierrez y Ismael González Arias, apreciáronse los tímidos avances daos nesi sen, dándo-y especial importancia a los llabores de la Xunta Asesora de Toponimia, anque tamien se llamentaron de “lo muncho que queda por facer”.

Nel informe presentáu pol Observatoriu, y que se va facer llegar a toles fuerces polítiques, valórense sobre manera tres aspectos de l’actual política llingüística: “el procesu de recuperación y d’oficialización toponímica entamáu pola Xunta Asesora de Toponimia; l’aumentu del presupuestu de la Oficina de Política Llingüística; y el fomentu a la creación y funcionamientu de los Servicios de Normalización Llingüística nos conceyos”.

Sicasí, l’Observatoriu fai un repasu críticu de dalgunes de les polítiques previstes nel Plan de Normalización, nes qu’echa en falta dalgunes midíes. Por exemplu, no tocante al presupuestu de la Oficina, afirma que “nun pue cayenos embaxo que tovía nun se superaron los 2360000 € del añu 1998 y que les necesidaes d’acuerdu col actual Plan andaríen, faciendo un cálculu bien modestu, alredor de los 2900000 €”.

Pesie a que’l trabayu de la Xunta Asesora de Toponimia ye seguramente’l más valoráu de tolos pasos daos a lo llargo del 2005, l’Observatoriu echa en falta dalgunes midíes complementaries a la oficialización toponímica, qu’aseguren l’usu real d’esos topónimos oficiales. Como lo seríen actuaciones polítiques de la Conseyería que garantizaren esi usu n’organismos y instituciones del Principáu, nos Ayuntamientos, nos medios de comunicación y nes empreses, asina como campañes d’información y sensibilización dientro los conceyos. Per otra parte, l’Observatoriu llamenta la “inhibición inesplicable de l’Academia de la Llingua Asturiana nun procesu de trabayu institucional en comuña, onde tan necesaria ye la so aportación”.

No tocante a la Rede de Servicios Municipales de Normalización, l’informe critica la falta d’un compromisu más decidíu per parte del Principáu, de forma “esplícita y efectiva, dende’l puntu de vista políticu y económicu”, considerando “una carencia grave” que nun se concrete esi apoyu na firma de Convenios colos conceyos, que-yos dieren “continuidá y estabilidá a dichos Servicios”.

Otru motivu d’esmolición pal Observatoriu de Política Llingüística ye la Radio Televisión del Principáu d’Asturies, al faltar “l’asturianu de los criterios de selección del personal, y pol fechu de que nun esisten mayores precisiones sobre la presencia de la llingua asturiana, que sigue siendo un enigma”. Poro, considera necesaria “la creación dientro del ente d’un órganu asesor llingüísticu, onde participen la Oficina de Política Llingüística, l’Academia de la Llingua Asturiana, la Universidá d’Uvieu y les asociaciones periódistiques”.

A lo llargo de la rueda de prensa, l’escritor y miembru del Observatoriu, Xuan Bello, afirmó ente les preguntes de los periodistes que “queda muncho tovía pal aprobáu”, en referencia a l’actuación del Gobiernu d’Asturies, y aseguró que taba convencíu de que la postura que mantienen cola llingua los partíos mayoritarios asturianos respuende más a posiciones “táctiques qu’ideolóxiques”. Bello dixo que se negaba a creyer que “políticos progresistes, como Javier Fernández, de verdá rechacen el reconocimientu d’un derechu”, en clara referencia a les últimes declaraciones del Secretariu de la FSA en rellación a la reforma estatutaria.